सुरेश जोशी

समुद्र मन्थनबाट निस्केको 
कालकुट विष सेवन गरी 
लोककल्याण हेतु
चुपचाप कैलाशतिर
गुमनाम भएका शिव
जसले नामका खातिर 
केही गरेनन् 
उनका अगाडि 
नाम होइन, काम थियो 
स्वार्थ होइन, 
लोककल्याण थियो ।

तर, तिनै शिवलाई 
चक्मा दिँदै
कलिका शिवहरू
बदनामको जोखिम मोल्दै
गुमनाम हुन चाहँदैनन् 

उनका कृत्यले 
लोककल्याण होला नहोला,
बाल मतलब छैन
केवल नामका खातिर नामको अर्थ 
छैन रे !
त्यही भएर त होला,
बदनामै भएर पनि 
गुमनाम हुन चाहँदैनन् 
कलिका शिवहरू ।
(डडेलधुरा)