काठमाडौं । नेपाली कांग्रेसका प्रमुख सचेतक रमेश लेखकले पाँच वर्षमा १३ पटक गठबन्धन फेरेर प्रधानमन्त्री पुष्पकमल दाहाल ‘प्रचण्ड’ १३ चोटि नै प्रधानमन्त्री बन्ने दाउमा रहेको आरोप लगाएका छन् ।

बिहीबार प्रतिनिधिसभा बैठकको विशेष समयमा उनले प्रधानमन्त्री प्रचण्डले १५ महिनामा तीनपटक गठबन्धन फेरिसकेको उल्लेख गरे । यही ‘स्पीड’मा गए १३ पटक गठबन्धन फेरबदल हुने देखिएको र त्यसमा प्रचण्डले नेतृत्व लिने उनको भनाइ छ ।

“१५ महिना हुन लागेको छ, तीनपटक गठबन्धन फेरिएको छ । यही स्पीडमा प्रम जाने हो भने १३ पटक गठबन्धन फेरिनेवाला छ,” उनले भने, “पाँच वर्षमा १२ पटकमा गठबन्धन फेर्ने, आफू १२ पटक भइरहने ? जतिसुकै इमानदार कदम हो ? जतिसुकै देशभक्ति हो भन्दा नेपाली जनता पत्याउँछ ? पत्याउँदैन नि ।”