काठमाडौं । पूर्वउपप्रधानमन्त्री एवं नेता वामदेव गौतमले नयाँ सत्ता गठबन्धन बन्नु सुखद रहेको बताएका छन् ।

सोमबार नेकपा (एमाले)सहित नेकपा (माओवादी केन्द्र) सम्मिलित कम्युनिस्ट गठबन्धन बनेकामा आफूलाई खुसी लागेको उनले उल्लेख गरे । यो गठबन्धनलाई ‘अन्तिम’सम्म टिकाउनुपर्नेमा उनले जोड दिए ।

वर्तमान सत्ता गठबन्धन टिकाउन एमाले अध्यक्ष केपी शर्मा ओलीले आफ्नो व्यवहार सुधार गर्नुपर्ने र प्रधानमन्त्री पुष्पकमल दाहाल ‘प्रचण्ड’ले अहिलेको जस्तो अस्थिरता कम्युनिस्ट गठबन्धनपछि देखाउनु नहुने उनले बताए । ओलीको व्यवहारमा सुधार नभए प्रधानमन्त्री प्रचण्डले पुनः नेपाली कांग्रेससँग गठबन्धन गर्दैनन् भन्न नसकिने उनको भनाइ छ ।

उनले अहिले अप्रत्याशित रूपमा सत्ता गठबन्धनको नयाँ समीकरण बनेको पनि बताए ।

न्युज एजेन्सी नेपालसित उनले व्यक्त गरेको भनाइ पढ्नोस्–
अप्रत्याशित हो । हिजोको सत्ता गठबन्धनको परिवर्तन र नयाँ सत्ता गठबन्धनको स्थापना अप्रत्याशित छ । यो कसैले चाहेका थिएनन् । एकातिर प्रधानमन्त्री छँदै छन्, त्यहाँ पहिलो पनि दुई महिनाजति केपी ओलीको गठबन्धनमा सामेल भएर प्रधानमन्त्री बन्नुभएको व्यक्ति । यहाँ प्रधानमन्त्री भएर काम गरिरहनुभएको छ । त्यस्तो अवस्थामा, त्यसरी गठबन्धन तोडेर फेरि अर्कोतिर जान सक्नुहुन्छ भनेर कसले कल्पना गरेको हुन्छ र ? सबैको निम्ति अप्रत्याशित भयो । यस्तो घटनाको निम्ति वातावरण धेरै पहिलादेखि बनिरहेको हुन्छ । सिर्जना हुने अलि लामो समय हुन्छ । तर, घटना स्वाट्ट घट्दा अप्रत्याशित लाग्छ ।

कांग्रेस कांग्रेस भएरै अघि बढ्नुपर्छ, बीपीको विचारधारा लिएरै कांग्रेस अघि बढ्नुपर्छ । कम्युनिस्ट कम्युनिस्ट भएरै अघि बढ्नुपर्छ । आफैँ जनताको बीचमा जानुपर्छ । जनतामा प्रतिबद्ध हुनुपर्छ, जनताका कामहरू गर्ने गरी आउनुपर्छ । कांग्रेस पनि त्यही किसिमले आउनुपर्छ । अहिले राजनीतिक अभिष्ट के देखियो भने कम्युनिस्टहरू एक ठाउँमा मिलेर समाजवाद निर्माण गर्ने दिशामा नेपाललाई लैजान सकिन्छ भन्ने विषय बन्न सक्छ । नेपाली कांग्रेससँग गएपछि त्यो बन्दैन । नेपाली कांग्रेस नयाँ पुँजीवादी व्यवस्थाको वकालत गर्ने पार्टी हो ।

पुँजीवादसहितको समाजवाद निर्माण गर्ने बाटोमा नेपालका कम्युनिस्टहरू जानुपर्छ । त्यो परिस्थिति सिर्जना भएको छ । जनतासँग मत प्राप्त गरिसकेपछि प्रधानमन्त्री पाउनको निम्ति जे पनि गर्ने, त्यस्तो किसिमको गर्नु हुँदैन । अहिले पनि कम्युनिष्ट र कांग्रेस मिलेर जाने स्थिति छ । यो स्थिति अन्त्य भइसकेको छैन । मिल्ने स्थिति पनि तुरुन्तै बन्छ र छुट्टिने स्थिति पनि तुरुन्तै बन्छ । अहिलेलाई यसलाई सकारात्मक ढंगले लिनुपर्छ । कम्युनिस्ट मिलून् र कम्युनिस्टको विचारधाराबमोजिम अघि बढून् ।

अहिलेको गठबन्धनको प्रमुख कारण प्रधानमन्त्री होइन, केपी शर्मा ओली नै हुन् । उहाँले २०८४ भन्दा पहिला आफूलाई कम्युनिस्टहरूलाई एकताबद्ध गर्दै एउटा शक्तिको रूपमा अघि सार्न चाहनुहुन्छ । त्यसको निम्ति अरूतिरभन्दा त मुख्य पार्टी नेकपा (माओवादी केन्द्र) नै हो, एमाले पछि । यी दुई पार्टीलाई एकीकृत गरेर जाँदा नै ०८४ मा एउटा शक्ति आर्जन गर्न सकिन्छ भन्ने मान्यता कमरेड केपी ओलीको हो ।

अलिअलि खटपट भइरहेको कांग्रेसका नयाँनयाँ नेताहरूले प्रधानमन्त्रीको आलोचना गर्ने, प्रधानमन्त्री छोडेर जाऊ, केही मतलब छैन, यस्ता प्रधानमन्त्री फेरि अर्को हुन्छ भन्ने कुराहरू उठाउने, शेरबहादुरजी चुप लागेर बस्ने र मौका पर्‍यो भने नयाँ केटाहरूलाई उचाल्दिने गरेकाले प्रचण्डजीको मन बिग्रिएका होलान् । उहाँले पहिला पनि केपी ओलीलाई छोड्न चाहनुभएको होइन, केपी ओलीको व्यवहारका कारणले उहाँ जानुभयो । संसद्को क्याबिनमा प्रधानमन्त्रीको क्याबिन हुन्छ, त्यो क्याबिनमा प्रधानमन्त्रीको कुर्सी छ, त्यो कुर्सीमा गएर बसिदिएर प्रधानमन्त्रीलाई उपर राख्ने, आफू प्रधानमन्त्री बस्ने कुर्सीमा बसेको छ । फेरि पत्रपत्रिका आदिमा आउँछ । गल्ती गरिएछ पनि नभन्ने । भाषण गर्दा पुरानो अवस्थाका कुराहरू कोट्ट्याउने, मैले गरेको ठिकै थियो भन्ने । आफूबाट आफैँ हट्ने स्थिति भयो ।

अहिले पनि त्यस्तै भयो भने स्थिति फरक हुन्छ । किनभने, कांग्रेसहरू चेतेका छन् । जे भन्छन् पाँचै वर्ष प्रधानमन्त्री प्रचण्डलाई भनेर हातखुट्टा सबैले सहीछाप दिन तयार हुन्छन् । केपी ओलीको व्यवहार, छुचो व्यवहार, अपमान गर्ने, कसैलाई पनि अपमान गर्ने, होच्याउनुपर्ने, आफूबाहेक सबै नराम्रो हुन् भन्ने पार्ने त्यस्तो व्यवहार हुन्छ, त्यसले उहाँसँगै गएकाहरू सधैँभर अपमानित महसुस गर्दछन् ।

केपी ओली, शेरबहादुर, प्रचण्डको व्यक्तित्व एकै हो नि । हामी एकै हौँ भन्नुपर्छ नि । त्यो नगर्नाले नै यो सबै बिग्रिएको छ । अब केपी ओलीले यो गठबन्धनलाई अन्तिमसम्म टिकाउनुपर्छ र एउटै कम्युनिस्ट पार्टी बनाउनका निम्ति उहाँ लाग्नुपर्छ । केपी ओलीले भुलसुधार गर्नैपर्छ । केपी ओलीकै कारण काखमा पुगेका प्रचण्ड फुत्किएर फेरि कांग्रेसतिर जानुपर्ने स्थिति किन सिर्जना भयो भन्दा प्रचण्डको व्यक्तित्वलाई कहिल्यै सम्मान गर्नु भएन । प्रधानमन्त्री भएको बेलामा सबैभन्दा माथिल्लो तहको व्यक्तित्व छ उहाँको भन्ने ठान्नुपर्छ । उहाँ बस्ने कुर्सीमा बस्दिने, आत्मलोचना छैन । व्यक्तित्वमा आघात पुगेपछि कसैले मान्दैन । उहाँले आफैँ प्रचण्ड हुन्जेलसम्म उथलपुथल हुन्छ, भइरहन्छ भन्नुभयो, त्यसले यतातिर छोडेर उतातिर जान सक्नुहुन्छ भन्ने सन्देश दिएको हो कि भन्ने परेको छ ।

केपी ओली र प्रचण्डले आफूलाई सहमत गराउन सक्ने, संयमित बनाउने र मित्रतापूर्ण सम्बन्ध कायम गरेपछि कुनै जोखिम छैन । जनतामा लोकप्रिय कार्यक्रम ल्याउनुपर्छ । उत्पादन र निर्माणमा विदेश गएका ६५ लाख सम्मका व्यक्तिलाई तुरुन्तै रोजगारी दिने गरी कार्यक्रम ल्याउनुपर्छ । केपी ओलीले प्रचण्डको सम्मान गर्न जान्नुस् । प्रधानमन्त्री हुँदासम्म प्रधानमन्त्रीको र प्रधानमन्त्री नहुँदा बेलामा आफूजस्तै भूमिका र इतिहास भएको व्यक्तिको महत्त्व घटाउन हुँदैन । र, प्रधानमन्त्रीलाई यताउति अहिलेको जस्तो अब गर्नु हुँदैन ।