काठमाडौं । छैटौँ संस्करणको पाँचपोखरी टी–ट्वान्टी जिल्ला स्तरीय क्रिकेट प्रतियोगिताको उपाधि पाँचपोखरी क्रिकेट क्लबले जितेको छ ।

शनिबार काठमाडौंको मुलपानीस्थित निर्माणाधीन अन्तर्राष्ट्रिय क्रिकेट मैदानमा भएको फाइनल खेलमा पाँचपोखरी क्रिकेट क्लबले ह्योल्मो–११ लाई १३ रनले पराजित गर्दै उपाधि चुमेको हो ।

फाइनल खेलमा टस हारेर पहिले ब्याटिङ गरेको पाँचपोखरी क्रिकेट क्लबले निर्धारित २० ओभरमा चार विकेटको नोक्सानीमा १६४ रनको योगफल तयार पारेको थियो ।

पाँचपोखरीका सार्थक धितालले ५२ बलमा ६ चौका र एक छक्कासहित ५४ रनको अर्धशतकीय इनिङ खेले । विवेक राना मगरले ३७, लाखपा लामाले १७ रन जोड्दा विजयकुमार धिताल १२ रन थपे । ह्योल्मो–११ का लाक्पा सोनम लामाले एक विकेट लिए ।

१६५ रनको विजय लक्ष्यका लक्ष्य पछ्याउने क्रममा ह्योल्मोले निर्धारित २० ओभरमा आठ विकेटको गुमाएर १५१ रनमात्र बनाउन सक्यो । ह्योल्मोका नाम्गेल शेर्पाले ४७ रन बनाए । विवेक तामाङले २२, दावा शेर्पाले २०, लाक्पा सोनम शेर्पाले १६ र विनोद तामाङले १२ रन जोडे ।

बलिङतर्फ पाँचपोखरी क्रिकेट क्लबका भुवन कुँवरले भुवन खड्काले तीन विकेट लिए । विवेक राणा मगर र विजयकुमार धितालले समान दुई÷दुई विकेट लिँदा सार्थक धितालले एक विकेट हात पारे ।

पाँचपोखरीलाई उपाधि जिताउन महत्वपूर्ण भूमिका खेलेका सार्थक धिताल प्रतियोगिताको प्लेयर अफ दि सिरिज घोषित भए ।

प्रतियोगिताको विजेता टोलीले एक लाख रुपैयाँका साथै ट्रफी प्राप्त गर्दा उपविजेता टोलीले ५० हजार रुपैयाँ प्राप्त गरेका छन् । जिल्लास्तरीय क्रिकेट प्रतियोगितामा सिन्धुपाल्चोकका आठ टोलीको सहभागिता रहेको थियो ।