काठमाडौं । हंगेरीका सांसदले सोमबार संवैधानिक अदालतका प्रमुख तामस सुलयोकलाई देशको नयाँ राष्ट्रपतिमा निर्वाचित गरेका छन् । १९९ मध्ये मतदानमा १४६ सांसद सहभागी थिए । पक्षमा १३४, विपक्षमा पाँच र सात मत बदर भएको थियो ।

अधिकांश विपक्षी सांसदले मतदानमा भाग लिएनन् । विपक्षी दलहरूले साझा उमेदवारलाई चुनौती दिने विषयमा सहमति जुटाउन सकेनन् ।

सुलयोकका पूर्ववर्ती क्याटालिन नोभाकले बाल दुर्व्यवहार माफीकाण्डपछि फेब्रुअरी १० मा राजीनामा दिएका थिए ।

सुलयोक पाँच वर्षको कार्यकालका निम्ति निर्वाचित भएका हुन् । मौलिक कानुनानुसार थप एक कार्यकालका लागि पुनः निर्वाचित हुन सक्नेछन् । उनको शपथग्रहण समारोह आउँदो मार्च ५ मा हुनेछ ।

सन् १९५६ मार्च २४ मा दक्षिणी हंगेरीको किस्कुनफेलेगिहाजामा जन्मिएका सुलयोकले कानुन र शिक्षा दुवैमा विशिष्टता हासिल गरेका छन् । १९८० मा सेजेडको जोसेफ एटिला विश्वविद्यालयबाट स्नातक गरेपछि उनले २००४ मा युरोपेली कानुन योग्यता र २०१३ मा पीएचडीका साथ आफ्नो कानुनी विशेषज्ञतालाई अगाडि बढाएका थिए ।

सुलयोकको व्यावसायिक यात्रामा न्यायिक लिपिक, कानुनी सल्लाहकार, वकिल र सेजेडमा अस्ट्रियाको मानार्थ कन्सुलरको भूमिका समेटिएको थियो । सिन्ह्वा/न्युज एजेन्सी नेपाल