काठमाडौं । चिकित्सा शिक्षा आयोगले शुल्क लिइ शिक्षण संस्थाहरूको अनुगमन नगर्न निर्देशन दिएको छ । आयोगको फागुन ८ गतेको कार्यकारी समिति बैठकले अनुगमन नगर्न परिषद्लाई पत्राचार गर्ने निर्णय गरेको हो ।
 
राष्ट्रिय चिकित्सा शिक्षा ऐन २०७५ ले शैक्षिक संस्थाको प्रशासनिक तथा प्राविधिक अनुगमनको अधिकार आयोगलाई दिएकाले परिषद्ले आफ्नो क्षेत्राधिकारभन्दा बाहिर गएर अनुगमन गर्न नपाउने आयोगको ठहर छ । आयोगको कार्यक्षेत्र परेको विषयमा प्रचलित कानुनको अवज्ञा हुनेगरी, परिषद्ले समेत शिक्षण संस्थाबाट शुल्क लिएर अनुगमन गर्ने कार्य उल्लेखित ऐन, नियमावली र कार्यविधीको प्रतिकूल हुने निर्णयमा उल्लेख छ । 

विषयगत काउन्सिलका विज्ञसहित शिक्षण संस्थाहरूको अनुगमन गर्न आयोगले प्रक्रिया अघि बढाइसकेको पनि आयोगले जानकारी गराएको छ । परिषद्ले गएको माघ २९ गते सार्वजनिक सूचना प्रकाशित गरी न्यूनतम मापदण्ड अनुसार भए/नभएको अनुगमनका निम्ति शिक्षण संस्थाहरुलाई अनुगमन शुल्क बुझाउन भनेको थियो ।