गोदावरी  । नेपाली कांग्रेस महासमिति सदस्य उषा गुरुङले कोसी प्रदेशमा कांग्रेसको भागमा आएको मुख्यमन्त्री पार्टीले लिँदा केन्द्रीय नेतृत्वलाई किन टाउको दुखेको भन्दै प्रश्न गरेकी छन् । ललितपुरको गोदावरीमा जारी महासमिति बैठकमा प्रतिवेदनमाथिको छलफलमा उनले कांग्रेसको भागमा आएको मुख्यमन्त्री माओवादीलाई दिनेहरूलाई कारबाही गर्न नसकेको भन्दै असन्तुष्टि जनाइन् ।

उनले महामन्त्रीहरूको प्रतिवेदन पनि एक भएर आउन नसकेको भन्दै आलोचना गरिन् ।

उनले हारेकाहरूलाई मात्र पटकपटक पद दिने हो भने पार्टीभित्र न्याय र समानता नहुने बताइन् । “केन्द्रीय सदस्यमा मनोनीत गर्नुछ भने महाधिवेशनमा भाग लिन नदिउँ । केन्द्रीय समितिमा हार्ने अनि फेरि मनोनीत गर्ने ? यो मानमर्दन भयो न्याय र अन्याय छुट्याउनु पर्छ । यसको जवाफ दिनुपर्छ,” उनले भनिन् ।

उनले धर्म र जातको आगो लगाएर देश जलाउने काममा सांसद समेत रहेका केन्द्रीय सदस्यहरू लागिपरेको भन्दै आक्रोश पोखिन् । उनले देश एकल जात र धर्मको मात्र नभएको स्मरण गराइन् । कोसी प्रदेशको नामकरणमा विषयमा पनि आपत्ति जनाइन् । उनले खोला र पहाड मात्र देश नभएको टिप्पणी गरिन् । 

“संविधान विरोधी नबनौँ, एकल धर्म र एकल जातिको देश हैन । केन्द्रीय सदस्यको नेतृत्वमा देशलाई जातिय धर्म द्वन्द्वमा लाने काम भएको छ । यसको विरोध गरौँ,” उनले भनिन्, “कोसी नाम राख्ने काम हतारमा भएको छ । खोला पहाड मात्र देश होइन । नामकरण गर्दा पहिचानलाई पनि स्वीकार गरिनुपर्छ ।”