काठमाडौं । रेफ्रीसँग खेल भावनाविपरीत व्यवहार गरेको आरोप पुष्टि भएपछि मालीका कप्तान हमारी ट्रोरेलाई चार खेलमा प्रतिबन्ध लगाइएको छ ।

३२ वर्षीय रक्षक ट्रोरेले अफ्रिका कप अफ नेसन्सको क्वार्टरफाइनलमा रेफ्रीमाथि अभद्र व्यवहार देखाएका थिए । आइभेरी कोस्टसँगको उक्त खेलमा ट्रोरेलाई खेलको अन्तिम ह्विसिलपछि रेफ्रीले सोझै रातो कार्ड देखाएका थिए । मालीले आइभेरी कोस्टसँग २–१ को हार बेहोर्दा इजिप्सियन रेफ्री मोहम्मद अदेलसँग विवाद गरेपछि ट्रोरेलाई सहकर्मीले तानेर ल्याएका थिए । 

यस घटनामा मालीको फुटबल संघलाई पनि टिमका खेलाडीले म्याच अफिसियलहरूसँग अभद्र व्यवहार गरेका कारण १० हजार डलर जरिबाना गरिएको छ । यस्तै, आइभेरी कोस्टलाई पनि अभद्र व्यवहारका कारण पाँच हजार डलर जरिबाना गरिएको छ ।

यस्तै, सेनेगलका क्रेपिन डिएट्टालाई पनि अफ्रिका फुटबल महासंघको आलोचना गरेका कारण प्रतिबन्ध र जरिबाना गरिएको छ । अफ्रिका कप अफ नेसन्सको प्रि–क्वार्टरफाइनलमा आइभेरी कोस्टसँग पेनाल्टी सुटआउटमा पराजित भएपछि उनले महासंघविरुद्ध बदनामपूर्ण प्रतिक्रिया दिएका थिए ।

यसैकारण २४ वर्षीय डिएट्टालाई चार खेलको प्रतिबन्ध र १० हजार डलरको जरिबाना लगाएको हो । टिमका खेलाडीहरूले अभद्र व्यवहार देखाएको भन्दै महासंघले सेनेगल फुटबल संघलाई समेत पाँच हजार डलर जरिबाना लगाएको छ ।