काठमाडौं । नेपाली राष्ट्रिय क्रिकेट टिमले भारतको दुई राज्यका टिमसँग ट्वान्टी–२० क्रिकेट शृङ्खला खेल्ने भएको छ । नेपाल क्रिकेट संघ (क्यान)ले सोमबार भारतमै हुने त्रिकोणात्मक शृङ्खलाको तालिका सार्वजनिक गरेको हो ।
तालिका अनुसार नेपालले बरोडा र गुजरातका टिमसँग मार्च ३१ देखि अप्रिल ७ सम्म शृङ्खला खेल्ने छ । नेपालले मार्च ३१ मा गुजरातसँग खेल्दै शृङ्खलाको सुरुआत गर्ने छ ।
नेपालले अप्रिल २ मा बरोडासँग, अप्रिल ३ मा गुजरातसँग र अप्रिल ५ मा पुनः बरोडासँग खेल्ने छ ।
शृङ्खलाको शीर्ष दुई टिम उपाधिका लागि अप्रिल ७ मा भिड्नेछन् । शृङ्खलाका सबै खेलहरू भारतका वापीमा हुने छन् ।
नेपाली राष्ट्रिय क्रिकेट टिमले अहिले घरेलु मैदानमा जारी आईसीसी क्रिकेट विश्वकप लिग–२ को शृङ्खला खेलिरहेको छ । कीर्तिपुरस्थित त्रिवि क्रिकेट मैदानमा सञ्चालित त्रिदेशीय शृङ्खलामा नेपालसँगै, नामिबिया र नेदरल्यान्ड्स सहभागी छन् ।
