काठमाडौं । अर्थमन्त्री डा. प्रकाशशरण महतले लघुवित्तलाई स्वस्थ बनाउन सरकारले गम्भीर पहलकदमी लिएको बताएका छन् । 

शनिबार काठमाडौंमा चौथो लघुवित्त सदस्य सम्मेलनको उद्घाटन गर्दै अर्थमन्त्री महतले लघुवित्तलाई कसरी स्वस्थ बनाउने भन्ने सबैको चासोको विषय भएको भन्दै सरकारले गम्भीर पहलकदमी लिएको बताए । 

उनले लघुवित्तलाई गरिबमुखी विपन्न नागरिक र महिलाहरुको आर्थिक उत्थान गर्ने माध्यमको रुपमा अघि बढाउनुपर्ने र राष्ट्र बैंकले उचित निगरानी गर्नुपर्ने बताए । अर्थमन्त्री महतले ऋण तिर्न नपर्ने भन्दै नागरिकको भावनामाथि खेल्न खोजिएको भन्दै यसलाई चिर्न जरुरी रहेको उल्लेख गरे । 

केही प्रवृत्तिहरू लघुवित्त र सहकारीमा देखिएको विचलनबाट फाइदा उठाएर राजनीतिक लाभ लिन खोजिरहेको उनको भनाइ छ । उनले यसमा सबै प्रतिवाद गर्न तयार हुनुपर्ने र सरकार पनि चुप लागेर नबस्ने स्पष्ट पारे ।