साहित्य
तिमी नहुँदा
खासै फरक परेको छैन ।
बिहान उदाएकै छ
दिन बितेकै छ
रात परेकै छ
बस एक्लै हुँदा निद्रा पर्दैन
अरू खासै केही फरक परेको छैन ।
तिमी नहुँदा नि सबै उस्तै छ
हरेक दिन भात पाकेकै छ,
मैले खाएकै छु
मिठो–नमिठोको कुरा अर्कै हो
अफिस पनि गएकै छु, काम गरी नै रहेको छु
बस अफिसबाट घर फर्किन हतार हुँदैन
अरू त खासै केही फरक परेको छैन ।
तिमी नहुँदा
तिम्रा देउताहरूले प्रसाद पाएका छैनन्
घण्टी र आरती गुञ्जिएको छैन
चराहरूले चारो पाएका छैनन्
सिरक र सिरानीहरूले
घाम देख्न पाएका छैनन्
त्यो बाहेक सबै उस्तै छ
अरू खासै केही फरक परेको छैन ।
तिमी नहुँदा नि
घर उस्तै छ, बारी उस्तै छ
अरूले हेर्दा सब ठीक छ
बस ! म मात्र एक्लो भएको छु
अरू त खासै केही फरक परेको छैन ।
प्रकाशित मिति: बुधबार, फागुन २, २०८० १२:०६
प्रतिक्रिया दिनुहोस्