काठमाडौं । दुबई पठाउने आश्वासन दिएर ठगी गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा सिन्धुपाल्चोकको भोटेकोसी गाउँपालिका–४ का ६१ वर्षीय डुलबहादुर खड्का रहेका छन् । उनी हाल ललितपुरको महालक्ष्मी नगरपालिका–६ मा बस्दै आएका थिए ।

प्रहरीका अनुसार डुलबहादुरले सुमन केसीसहितका पीडितलाई ६ लाख ५० हजार रुपैयाँ लागतमा दुबई पठाउने आश्वासन दिएका थिए । उनले दुबई पुगेपछि प्रतिष्ठित कम्पनीमा काम लगाइदिने र मासिक ९० हजार रुपैयाँ तलब हुने बताएका थिए ।

तर, पीडितहरूबाट पटकपटक गरी तीन लाख रुपैयाँ लिइसकेपछि उनी सम्पर्कविहीन बनेको प्रहरीले जनाएको छ ।

उनलाई आइतबार काठमाडौंस्थित सामाखुसीबाट पक्राउ गरिएको छ । थप अनुसन्धान तथा कारबाहीका लागि उनलाई वैदेशिक रोजगार विभाग ताहाचल पठाइएको छ ।