अलका मल्ल
बहुरूप प्रतिभा बोकेको सेतो पाना
बुझ्नै गाह्रो आँकडा र सन्दर्भहरू
हेर्दा जाबो देखिने
तौलमा फिस्टे
तराजुमा तौल निकाल्न गाह्रो एक पाना
दार्शनिकले अभिलेख कोर्न भ्याउने
एक रुपैयाँको सेतो पाना
संसार रच्न सक्ने वाह !
चमत्कारी अद्भुत
एक मुट्ठी रङ अनेक तरंग
चित्रकारले चित्र कोर्न सक्ने
एक निर्णयले जीवन परिवर्तन गर्ने
एक दस्तखतले संसार हल्लाउने
सफा हावा
सङ्लो श्वास
दूषित हावा
धमिलो प्रवाह
हरप्रसंग निबन्ध समेट्न सक्ने
प्रणय दिवस
अनुरागको खुलदुली लेख्न सक्छु
गहभरि नअटेका हर्ष
खुसियालीको इन्द्रेणीले
आकाश सजाएकी छु प्रिय
सेतो पाना रातो गुलाब
प्रणय दिवसको उपहार कोरेकी छु
लाग्छ, हाम्रै लागि बनेको
सेतो पाना
दुई आत्माको मिलन
अमर प्रेमको इतिहास रच्न
हस्ताक्षरको मजबुत प्रमाण समेटेकी छु
प्रियतम तिमीलाई
(काठमाडौं)