काठमाडौं । नेपाल राष्ट्र बैंकले शुक्रबार चालु आर्थिक वर्ष २०८१/८२ को मौद्रिक नीति सार्वजनिक गरेको छ । राष्ट्र बैंकले सार्वजनिक गरेको मौद्रिक नीतिले आर्थिक गतिविधिलाई चलायमान बनाउनेमा व्यवसायी तथा सेयर लगानीकर्ताहरू सकारात्मक देखिएका छन् । सेयर लगानीकर्ताले राखेका मागहरू भने पूर्णरूपमा सम्बोधन नभएको उनीहरूको गुनासो छ ।

सेयर लगानीकर्ताहरूले सेयर धितो कर्जाको सीमा हटाउन माग गरेका थिए । तर, राष्ट्र बैंकले संस्थागत लागानीकर्ताका लागि लगाइएको २० करोडको सीमा हटाएको छ । व्यक्तिगत सेयर धितो कर्जाको १५ करोडको सीमा भने यथावत् राखिएको छ ।

सेयर लगानीकर्ता संघ नेपालका कार्यवाहक अध्यक्ष ताराप्रसाद फुलेलले पनि अहिलेको मौद्रिक नीतिले अर्थतन्त्रलाई चलायमान बनाउन सहयोग गर्ने बताए । बैंक तथा वित्तीय संस्थाहरूले मार्जिन प्रकृतिको सेयर धितोमा संस्थागततर्फको २० करोड रुपैयाँको सीमा हटाउनु सकारात्मक रहेको उनले बताए ।

“केन्द्रीय बैंकले चालु आर्थिक वर्ष २०८१/८२ को मौद्रिक नीति सार्वजनिक गर्दै संस्थागत लगानीकर्ताहरूका लागि बैंक तथा वित्तीय संस्थाहरूले मार्जिन प्रकृतिको सेयर धितोमा संस्थागततर्फ २० करोड रुपैयाँको सीमा हटाएको छ । नीतिगत दर घटाएको छ । हालको नीतिगत दर ५.५ प्रतिशतलाई ५ मा झारिएको छ,” उनले भने, “ब्याजदर करिडोरको माथिल्लो सीमाको बैंकदर ७ प्रतिशतबाट ६.५ प्रतिशतमा झारिएको छ । उपलब्ध हुने सर्तहरूलाई लचिलो बनाइने समेत घोषणा गरिएको छ ।”

त्यस्तै, उनले लघुवित्त कम्पनीहरूका राहतका कार्यक्रमले पुँजी बजारमा सकारात्मक प्रभाव पार्ने बताए । लगानीकर्ताका धेरै मागहरू सम्बोधन नभए पनि आगामी समीक्षामा खुकुलो पार्दै आउनेमा आशावादी रहेको फुलेलको भनाइ छ ।

त्यसैगरी, पुँजी बजार लगानीकता संघकी अध्यक्ष राधा पोखरेलले पनि लगानीकर्ताले राखेका सबै माग पूरा नभएको बताइन् । उनले पनि आगामी समीक्षामा लगानीकर्ताका माग सम्बोधन हुनेमा आशावादी भएको बताइन् ।

“हामीले सेयर धितो कर्जामा लगाइएको सीमा हटाउन माग गरेका थियौँ,” उनले भनिन्, “संस्थागततर्फको हट्यो, जुन सकारात्मक छ । अर्थतन्त्र चलायमान बताउन यो मौद्रिक नीतिले भूमिका खेल्छ ।”

त्यसैगरी, अर्का लगानीकर्ता दीपक गौतम पनि मौद्रिक नीति बजारमैत्री आएको बताउँछन् । यसले बजारलाई चलायमान बनाउन मद्दत गर्ने उनको भनाइ छ ।

“संस्थागत सेयर लगानीकर्तालाई सेयर लोनको क्याप हट्यो । सेयर लोनको जोखिमभार सर्कुलरमार्फत सम्बोधन गरिने, राष्ट्र बैंकले कर्जा विस्तार लक्ष्य बढायो,” गौतमले सामाजिक सञ्जालमा लेखेका छन्, “अर्थतन्त्र चलायमान बनाउन निर्माण व्यवसायीको समस्यालाई ६ बुँदामार्फत विशेष सम्बोधन गरिएको छ । लघुवित्तको ऋण तिर्न नसकेकालाई कर्जा पुनर्तालिकीकरणको व्यवस्था गरिएको छ ।”

बैंकहरूको खराब कर्जा व्यवस्थापन गर्न छुट्टै संस्थाको स्थापना गर्ने विषयले पनि बजारमा सकारात्मक सुधार हुने गौतमको भनाइ छ ।

सेयर धितोकर्जाको व्यक्तिगत र संस्थागत सीमा नै हटाएको भए बजारमा सकारात्मक सन्देश जाने जनरल इन्भेस्टर एसोसिएसनका अध्यक्ष दीपक कार्की बताउँछन् । तर, आगामी दिनमा हुने मौद्रिक नीतिको समीक्षाले यस्ता कुरा ध्यान दिनमा उनी आशावादी देखिएका छन् ।

“राष्ट्र बैंकले संस्थागत लगानीकर्ताले लिने सेयर धितोकर्जाको सीमा हटाएको छ । यो सकारात्मक छ,” उनले भने, “व्यक्तिगत १५ करोडको सीमा पनि हटाएको भए राम्रो हुन्थ्यो ।”

त्यसैगरी नेपाल सेयरधनी संघका अध्यक्ष घनश्याम पाण्डेले पनि लघुवित्त क्षेत्रमा केही सकारात्मक नीति आएको बताए । बैंक तथा वित्तीय संस्थालाई सहज हुने खालको नीति आएकाले आगामी दिनमा बजार सकारात्मक बन्ने अनुमान गर्न सकिने पाण्डेको भनाइ छ ।