काठमाडौं । ठूलो संख्यामा नेपालीहरू वर्षेनी रोजगारी खोज्दै विदेश जाने गर्छन् । गत आर्थिक वर्ष २०८०/८१ मात्र श्रम स्वीकृति लिएर ७ लाख ४१ हजार २९७ जना नेपाली वैदेशिक रोजगारी खोज्दै विश्वका १४९ देश पुगेका थिए ।

रोजगारी खोज्दै जसरी नेपाली विदेश जाने गर्छन्, त्यसरी नै विदेशी पनि नेपालमा आउने गर्छन् । रोजगारी खोज्दै विदेश जाने नेपालीको तुलनामा नेपालमा आउने विदेशीको संख्या निकै सानो छ । तर यो बढ्दो क्रममा देखिन्छ ।

पछिल्लो एक वर्षमा २ हजार ६८५ जना विदेशी नागरिक श्रम स्वीकृति लिँदै नेपालमा काम गर्न आएका छन् । श्रम, रोजगार तथा सामाजिक सुरक्षा मन्त्रालयअन्तर्गत श्रम तथा व्यवसायजन्य सुरक्षा विभागका अनुसार, गत आर्थिक वर्ष २०८०/८१ मा उक्त संख्यामा विदेशी श्रम स्वीकृति लिएर नेपालमा काम गर्न आएका हुन् ।

२०८० साउन १ गतेदेखि २०८१ असार मसान्तसम्म १ हजार २० जना विदेशीले नयाँ श्रम स्वीकृति र १ हजार ६६५ जना विदेशीले श्रम स्वीकृति नवीकरण गरेको विभागले जनाएको छ । 

गत असार महिनामा मात्र ३४९ जना विदेशीले नेपालमा काम गर्न श्रम स्वीकृति लिएको विभागको तथ्याङ्कले देखाउँछ । अघिल्लो आर्थिक वर्ष २०७९/८० मा २ हजार ९९४ जना विदेशीले श्रम स्वीकृति लिई नेपालमा काम गरेका थिए । 

विभागका अनुसार, आर्थिक वर्ष २०७८/७९ मा २ हजार १८१ जना विदेशी र आर्थिक वर्ष २०७७/७८ मा २ हजार ३९० जना विदेशीले श्रम स्वीकृति लिई नेपालमा काम गरेका थिए । 

पछिल्लो चार वर्षमा अर्थात् आर्थिक वर्ष २०७७/७८ देखि २०८०/८१ सम्मको अवधिमा नेपालमा काम गर्न विभागबाट कुल १० हजार २५० जना विदेशीले श्रम स्वीकृति लिएको देखिन्छ । यसमा श्रम स्वीकृति नलिई नेपालमा काम गर्ने भारतीय कामदारको संख्या जोडिएको छैन ।
 
पछिल्लो साढे सात वर्षको अवधि (२०७३ पुस देखि २०८१ असार) मा विश्वका १०८ देशका १३ हजार ४०९ जना विदेशी नागरिकले श्रम स्वीकृति लिएर नेपालमा काम गरेको विभागको तथ्याङ्कले देखाउँछ । यसरी काम गर्न आउनेमा ११ हजार ८७१ जना पुरुष र १ हजार ५३८ जना महिला छन् ।

बितेको साढे ७ वर्षमा श्रम स्वीकृति लिई नेपालमा काम गर्न आउने विदेशीमा सबैभन्दा ठूलो संख्या चिनियाँको छ । उक्त अवधिमा ९ हजार ५२५ जना चिनियाँले नेपालमा काम गरेका छन् । 

त्यही समयमा बेलायतका ५७५, अमेरिकाका ४२४, दक्षिण कोरियाका ३१९, जापानका २८५, भारतका २५८, अष्ट्रेलिायका १५२, श्रीलंकाका १३६, जर्मनीका १२२, फ्रान्सका १०५ र फिलिपिन्सका १०२ जना नागरिकले श्रम स्वीकृति लिई नेपालमा काम गरेको देखिन्छ । 

नेपालमा काम गर्न उत्तर अमेरिका, दक्षिण अमेरिका, युरोप, अफ्रिका, एसिया र अष्ट्रेलिया महादेशमा रहेका कुनै न कुनै राष्ट्रका नागरिकले श्रम स्वीकृति लिएका छन् ।

भारतीय नागरिकलाई नेपालमा काम गर्न श्रम स्वीकृति लिनुनपर्ने भएपनि केही भारतीयले भने श्रम स्वीकृति लिएर काम गरिरहेका छन् । नेपालका ठूला बैंक र संस्थामा काम गर्ने भारतीयले श्रम स्वीकृति लिने गरेका छन् । 

विभागका अनुसार, हालसम्म नेपालमा श्रम स्वीकृति लिई काम गर्ने विदेशीको संख्या २० हजार ९७१ रहेको छ । यसमा १८ हजार ४४७ जना पुरुष र २ हजार ५२४ जना महिला छन् ।