काठमाडौं । काठमाडौंबाट प्राविधिक चेकजाँचका लागि पोखरा लैजान लागिएको सौर्य एयरको जहाज दुर्घटनामा परेको छ । त्रिभुवन विमानस्थलबाट उडान भर्नासाथ जहाज दुर्घटनामा परेको थियो ।

उक्त दुर्घटनामा चालक दलका सदस्य र प्राविधिक गरी १८ जनाको मृत्यु भएको नागरिक उड्ययन प्राधिकरणले जनाएको छ  । काठमाडौंस्थित त्रिभुवन विमानस्थलबाट प्राविधिक टोली लिएर पोखराका लागि उडेको सौर्य एयरको सीआरजे७ (९एनएएमई) जहाज धावनमार्ग छोड्नासाथ दुर्घटनामा परेको थियो ।

त्रिभुवन अन्तराष्ट्रिय विमानस्थल नागरिक उड्यन प्राधिकरणले जारी गरेको विज्ञप्तिअनुसार ११ः११ मा विमान उड्नेबित्तिकै दाहिनेतर्फ मोडिन गई पूर्वतर्फ खसेको हो । प्रहरीका अनुसार बुद्ध एयरलाइन्सको ह्याङ्गर पछाडिको क्षेत्रमा जहाज बजारिएको थियो । 

जहाज दुर्घटनाको चार मिनेटपछि ११ः१५ मा दुर्घटनाका बारेमा जानकारी सुरक्षा निकायले पाएका थिए । विमान दुर्घटना हुनासाथ अग्नि नियन्त्रण तथा खोज तथा उद्धारका लागि विमानस्थबाट दमकल, एम्बुलेन्स र सुरक्षाकर्मीको टोली दुर्घटनास्थल पुगेको थियो ।

उद्धारका लागि नेपाली सेना, नेपाल प्रहरी र सशस्त्र प्रहरी बलको टोली खटिएको उपत्यका प्रहरी कार्यालयका प्रमुख एआईजी दीपक थापाले जानकारी दिए । सूचना पाएको १९ मिनेटपछि ११ः३४ मा विमानका क्याप्टेन ३७ वर्षीय मनिष शाक्यको उद्धार गरिएको उपत्यका कार्यालयका एसएसपी दिनेशराज मैनालीले जानकारी दिए । प्राधिकरणका अनुसार दुर्घटनामा परेको २३ मिनेटमा पाइलटको उद्धार गरिएको थियो । 

उनले सन् २००९ देखिनै विभिन्न एयरलाइन्सको विमान उडान गरेको जनाइएको छ ।  

उनलाई प्रहरीले काठमाडौं मेडिकल कलेज पठाएको थियो । प्रहरीका अनुसार उनको आँखामा चोट लागेको छ भने बोल्न सक्ने अवस्थामा छन् । ११ः११ मा खसेको विमानमा ११ः४० सम्म आगलागी भएको थियो ।
प्रहरी अनुसार २९ मिनेटसम्म विमानमा आगो लागेको थियो । 

आगो नियन्त्रण गर्न समय लाग्दा क्याम्टेन शाक्यबाहेक अन्यको जीवितै उद्धार गर्न सम्भव नभएको हो । विमानस्थलको सुरक्षाका लागि अग्नि नियन्त्रण टोली र नेपाली सेनाको क्यूआरटी टोली राखिएको हुन्छ । उनीहरु चौबीसै घण्टा नै तयारी अवस्थामा हुन्छन् ।

प्रहरीका अनुसार उद्धार टोलीले जलेको विमानबाट १२ः३० मा तीनजना गम्भीर अवस्थामा रहेका व्यक्तिहरु निकालेको थियो । तर १२ः३९ मै तीन जनालाईसमेत चिकित्सकले मृत घोषणा गरेका थिए ।

त्यस्तै अन्य १५ जनाको शव भने उद्धार टोलीले १२ः४५ मा निकालेको हो । १५ जनाकै शव त्रिभुवन शिक्षण अस्पतालमा राखिएको छ । पोस्टमार्टमपछि मात्रै मृतकका आफन्तलाई शव बुझाइने प्रहरीले जनाएको छ । 

दुर्घटनापछि भीआईपीको लस्कर

विमान दुर्घटनापछि भने त्रिभुवन विमानस्थलमा भीआईपीको लस्कर नै लागेको छ ।  उद्धारका खटिएका उद्धार टोलीबाहेक घटनास्थलमा तत्काल भीआईपी जानुलाई सुरक्षाको दृष्टिकोणमा त्यति जायज मानिँदैन ।

सुरक्षामा खटिएका उद्धार टोलीलाई भीआईपीको आगमनले असर गर्ने हुँदा तत्काल भीआईपी दुर्घटनास्थलमा जाँदैनन् । तर, विमान दुर्घटनापछि भने गृहमन्त्री रमेश लेखकदेखि प्रधानमन्त्री केपी शर्मा ओली आफैँ विमानस्थल नै पुगेका छन् । 

प्रधानमन्त्रीसहित मन्त्रीहरु पनि पुगेपछि सुरक्षा निकायका प्रमुखहरु पनि विमानस्थल पुगेका थिए ।