काठमाडौं । नेपाल खेलकुद पत्रकार मञ्च (एनएसजेएफ)ले हरेक वर्ष आयोजना गर्ने एनएसजेएफ पल्सर स्पोर्ट्स अवार्ड–२०७९ को वर्ष युवा खेलाडीको मनोनयन सार्वजनिक भएको छ । 

आयोजक मञ्चले मंगलबार अवार्डको २०औँ संस्करणको वर्ष युवा खेलाडीको मनोनयमा पर्न सफल आठजनाको नाम सार्वजनिक गरेको हो । वर्ष–२०७९ को युवा खेलाडीको मनोनयमा बक्सिङका विजय बाटा, क्रिकेटका देव खनाल, क्रिकेटकै दीपेश कँडेल, एथ्लेटिक्सकी राममाया बुढा, गल्फका सद्भाव आचार्य, फुटबलकी सुजाता तामाङ, फुटबलकै युनेश बुढाथोकी र बक्सिङकी सुष्मा तामाङ मनोनयमा परेका छन् ।

मञ्चले यसअघि वर्ष युवा खेलाडीमा पाँचजना मनोनयन सार्वजनिक गर्दै आएको थियो । तर, यस संस्करणदेखि नयाँ प्रयोग सुरु गरेको मञ्चले आठ खेलाडी पहिलो चरणको मनोनयनमा राखेको छ । जसबाट केही दिनपछि शीर्ष तीनजना छानिने र अवार्डको दिन उक्त तीनजनाबाट विजेता चुनिने मञ्चले जनाएको छ । 

यस्तो छ मनोनयनमा परेका खेलाडीको प्रदर्शनः
विजय बाटा (बक्सिङ)
– एएसबीसी यू–२२ एसियन महिला तथा पुरुष बक्सिङ च्याम्पियनसिपमा पुरुषतर्फ कांस्य पदक विजेता खेलाडी
– नवौँ राष्ट्रिय खेलकुदमा रजत पदक जित्न सफल 

देव खनाल (क्रिकेट)
– नेपालले आठ वर्षको खडेरी तोड्दै २०२४ को आईसीसी यू–१९ विश्वकप क्रिकेट खेल्न सफल 
– देव खनालको कप्तानीमा नेपाल यूएईलाई फाइनलमा पराजित गरी एसिया छनोटको उपाधि जित्न सफल
– पाँच खेलको तीन इनिङ्समा ६५ माथिको औसतमा १९७ रन बनाउन सफल 
– कुवेतविरुद्ध राउन्ड रोबिन खेलमा १२५ र यूएईविरुद्ध फाइनलमा ५१ रन बनाउन सफल 
– उनकै कप्तानीमा लुम्बिनी प्रदेशले यू–१९ राष्ट्रिय प्रतियोतामा उपविजेता 

दीपेश कँडेल (क्रिकेट)
– आईसीसी यू–१९ विश्वकपको एसिया छनोटको फाइनलमा युएईविरुद्ध ह्याट्रिक विकेट 
– यूएईलाई जितका निम्ति तीन ओभरमा ११ रन आवश्यक हुँदा दीपेशले ४८औँ ओभरमा बलिङ मोर्चा सम्हाल्दै पहिलो तीन बलमा तीन रन मात्र दिए । त्यसपछि लगातार तीन विकेट लिई ह्याट्रिक पूरा गरेर आईसीसी यू–१९ विश्वकपको एसिया छनोटको उपाधि दिलाउन सफल । फाइनलमै पाँच विकेट लिन सफल ।
– नेपालले चार खेलमा १२ विकेट लिन सफल 

राममाया बुढा (एथलेटिक्स)
– १६औँ एसियाली क्रसकन्ट्री च्याम्पियनसिपमा जुनियर व्यक्तिगत र टिम इभेन्टमा रजत (महिला जुनियर ६ किमी)
– एपीएफ परिवार महिला संघ हाफ म्याराथनमा स्वर्ण विजेता
– गोल्डेन एथलेटिक्स मिटको १५०० मिटर दौडमा स्वर्ण र पाँच किमीमा रजत 
– देवदह हाफ म्याराथनमा स्वर्ण 
– राइट टू प्रोटिन रनमा रजत 
– दोस्रो वीर गणेशमान सिंह १० किमी, मदन भण्डारी मेमोरियल र केपी ओली रोड रेस पाँच किमी रोड रेसमा रजत 
– तेस्रो जुनियर राष्ट्रिय एथलेटिक्सको तीन हजार मिटर दौडमा स्वर्ण 

सद्भाव आचार्य (गल्फ)
– सुवास तामाङसँग मिलेर नेपाल टूरिजम कप र बंगलादेश एमेच्योर गल्फ च्याम्पियनसिपमा स्वर्ण जित्न सफल 
– नवौँ राष्ट्रिय खेलकुदमा त्रिभुवन आर्मी क्लबका लागि स्वर्ण, व्यक्तिगतमा रजत जित्न सफल

सुजाता तामाङ (फुटबल)
– २०७९ कात्तिकमा बंगलादेशमा भएको साफ यू–१५ महिला च्याम्पियनसिपको उपाधि विजेता 
– साफ यू–१५ च्याम्पियनसिपकी उत्कृष्ट गोलकिपर । चार खेलमध्ये तीन खेलमा क्लिनसिट राख्न सफल     
– बंगलादेशसँग १–१ को बराबरी खेलमा पेनाल्टी बचाउन सफल गोलकिपर 
–२०७९ चैतमै बंगलादेशमा भएको साफ यू–१७ महिला च्याम्पियनसिपमा पनि उत्कृष्ट गोलकिपर घोषित । एक क्लिनसिट राख्न सफल 

सुष्मा तामाङ (बक्सिङ)
– एएसबीसी यू–२२ एसियन महिला तथा पुरुष बक्सिङ च्याम्पियनसिपमा रजत
– नेपालले एसियाली स्तरमा जितेको अहिलेसम्मको ठूलो पदक । फाइनलमा उज्वेकिस्तानकी फोजिलोभा फार्जोनासँग अंकका आधारमा पराजित । त्यसअघि उनको भियतनामकी फाम थी किनहान र मंगोलियाकी बाइसेनबाई जनरगुलीविरुद्ध जित  ।
– एएसबीसी यू–२२ च्याम्पियनसिपमा रजत जितेपछि सिधै महिला वल्र्ड बक्सिङ च्याम्पियनसिपमा छनोट 
– नवौँ राष्ट्रिय खेलकुदमा महिला ४८ केजी तौलमा वाग्मती प्रदेशका लागि स्वर्ण
– विश्व महिला बक्सिङ च्याम्पियनसिप, भारतमा सहभागी  

युनेश बुढाथोकी (फुटबल)
– श्रीलंकाको कोलम्बोमा भएको साफ यू–१७ च्याम्पियनसिप फुटबलमा उपविजेता
– नेपाललाई साफ यू–१७ च्याम्पियनसिपको फाइनल पुर्‍याउन महत्त्वपूर्ण योगदान 
– च्याम्पियनसिपमा संयुक्त रूपमा सर्वाधिक चार गोल गरेका थिए । समूह चरणमा भुटान र भारतविरुद्ध १–१ तथा सेमिफाइनलमा श्रीलंकाविरुद्ध दुई गोल गर्न सफल 
– भारतसँग एक गोलले पछि पर्दा नेपालले उत्कृष्ट पुनरागमन गर्दै ३–१ ले जित्न सफल