काठमाडौं । नेपाल उद्योग वाणिज्य महासंघ (एफएनसीसीआई)ले मुलुक आर्थिक समस्यासँग जुधिरहेका बेला उद्यमी व्यवसायीमाथि भैरहेको धरपकड एवं पक्राउले लगानी सम्मेलनमा नकारात्मक प्रभाव पर्ने भन्दै यस विषयमा ध्यानाकर्षण गराएको छ । 

बिहीबार सीजी होल्डिङ्सका अध्यक्ष तथा प्रबन्ध निर्देशक अरुणकुमार चौधरीलाई नेपाल प्रहरीको केन्द्रीय अनुसन्धान ब्युरोले पक्राउ गरेकोप्रति आपत्ति जनाउँदै प्रेस विज्ञप्ति जारी गरेको हो । सरकारसँग यस्तो विषयमा पटक पटकको छलफलमा व्यवसायीलाई दोषी नभइ पक्राउ गर्न नहुने भन्दै आएको पनि विज्ञप्तिमा उल्लेख छ । 

“महासंघले सम्बन्धित विषयको गहिरो अनुसन्धान नभएसम्म व्यवसायीलाई पक्राउ नगर्न सरकारलाई पटक–पटक आग्रह गर्दै आएको छ । पहिले गिरफ्तार गर्ने र त्यसपछि समस्या पहिल्याउने प्रवृत्तिले देशको वर्तमान व्यावसायिक परिदृश्यबाट पहिले नै निराश भएका व्यवसायीहरूलाई थप निरुत्साहित बनाएको छ । महासंघ यस विषयमा पहिले सत्यतथ्य पत्ता लगाएर आवश्यक परे कानुनी कारबाही अघि बढाउन सरकारलाई आग्रह गर्दछ । साथै, केही महिनाभित्रै नेपालमा लगानी सम्मेलन हुन गैरहेकोसन्दर्भमा यस्ता पक्राउले हालका र सम्भावित स्वदेशी तथा विदेशी लगानीकर्तामा नकारात्मक सन्देश जाने तर्पm महासंघ सरकार एवं सम्बन्धित निकायको ध्यानाकर्षण गराउन चाहन्छ,” विज्ञप्तिमा उल्लेख छ । 

त्यस्तै, आजै नेपाल उद्योग परिसंघले पनि पत्रकार सम्मेलन गरेर दोषी नभइ नै व्यवसायीलाई धरपकड र पक्राउ गर्न नहुने बताएको छ ।