काठमाडौं । दीपेन्द्रसिंह ऐरीको कप्तानीमा रहेको विभागीय टोली नेपाल पुलिस क्लबले प्रधानमन्त्री कप पुरुष राष्ट्रिय क्रिकेट प्रतियोगिताको लिग चरणमा शतप्रतिशत जित निकालेको छ ।

बिहीबार सम्पन्न लिग चरणको अन्तिम खेलमा सुदूरपश्चिम प्रदेशविरुद्ध ७८ रनको सहज जित निकालेसँगै पुलिस अपराजित बनेको हो ।

मूलपानीस्थित माथिल्लो क्रिकेट मैदानमा भएको खेलमा पुलिसले प्रस्तुत गरेको १९९ रनको लक्ष्य पछ्याउने क्रममा सुदूरपश्चिमले ३७.१ ओभरमा सबै विकेट गुमाएर १२० रनमात्र बनाउन सक्यो । 

सुदूरपश्चिमका गजेन्द्र बोहराले ३० रन बनाए । किरण ठगुन्ना र नरेन साउदले समान २४ रन जोड्दा सुदूरपश्चिमका अन्य ब्याटरले दोहोरो अंकमा रन जोड्न सकेनन् ।

सुदूरपश्चिमलाई सस्तैमा घातक बलिङ गरेको पुलिसका कप्तान दीपेन्द्रसिंह ऐरीले सात विकेट लिए । १० ओभर बलिङ गरेका दीपेन्द्रले चार मेडन फ्याक्दै २० रनमात्र खर्चिए ।

यसबाहेक, सागर ढकाल, ललित भण्डारी र ललितनारायण राजवंशीले समान एक विकेट लिए ।

त्यसअघि टस जितेर ब्याटिङमा आएको पुलिसले ४७.५ सबै विकेट गुमाएर १९८ रनको योगफल खडा गरेको थियो ।
पुलिसका शंकर रानाले ४६ रन बनाए । कप्तान दीपेन्द्रले ४४ रन थप्दा अर्जुन साउदले ३२ र आरिफ सेखले २६ रन जोडे ।

सुदूरपश्चिमका शेर मल्लले तीन विकेट लिए । नारायण जोशी, विकाश आग्री र मिलन बोहराले समान दुई विकेट लिए । दीपक चन्दले एक विकेट हात पारे ।

तालिकाको शीर्ष स्थानमा रहेको पुलिसले जितसँगै नौ खेलबाट १८ अंक जोडेको छ । पुलिसले अब प्रतियोगिताको उपाधिका लागि अर्को विभागीय टिम त्रिभुवन आर्मी क्लबसँग खेल्नेछ ।

आर्मीले बिहीबार नै भएको अर्को खेलमा गण्डकी प्रदेशविरुद्ध ६८ रनको जित निकाल्दै लिग चरणमा दोस्रो स्थान निश्चित गरेको हो । 

कीर्तिपुरस्थित त्रिवि क्रिकेट मैदानमा भएको खेलमा आर्मीले दिएको १३३ रनको लक्ष्य पछ्याउने क्रममा गण्डकीले २३.४ ओभरमा सबै विकेट गुमाएर ६४ रनमात्र बनाउन सक्यो । 

प्रतियोगिताको फाइनल खेल शनिबार त्रिवि क्रिकेट मैदानमा हुने छ ।