काठमाडौं । चलचित्र विकास बोर्डका अध्यक्ष भुवन केसीले कलाकारहरूले मदिराको विज्ञापनमा काम गर्न नहुने बताएका छन् । 

काठमाडौंमा सोमबार भएको ‘विज्ञापनमा कलाकारको भूमिका’ विषयक अन्तरक्रियामा केसीले कलाकारहरूले कुन सामग्रीको विज्ञापन गर्ने र के को नगर्ने ? भन्नेकुरामा धेरै सजग हुन जरुरी रहेको बताए । 

उनले मदिरा, चुरोटलगायत विज्ञापन कलाकारहरूले गर्न  नहुने बताए । गलत सन्देश दिने विज्ञापनमा काम गर्न नहुनेमा उनको जोड छ । केही समय अगाडि केकी अधिकारी र प्रदीप खड्काले एक मदिराको विज्ञापन गरेपछि केहीले यसमा प्रश्न उठाएका थिए । 

कलाकारहरूले सामाजिक कामका विज्ञापनहरू निःशुल्क गर्नुपर्ने उनको धारणा थियो । विज्ञापन दाताहरूले पनि कुन उत्पादनको विज्ञापन गराउने र कुनको नगराउने भन्नेमा धेरै सतर्क हुन जरुरी रहेको उनले बताए । 

अध्यक्ष केसीले नेपालमा चल्ने कुनै पनि विज्ञापनमा नेपाली कलाकार अनिवार्य हुनुपर्नेमा जोड दिए ।