काठमाडौं । बुद्ध एयरमा दाजुभाइको विवाद चरमोत्कर्षमा पुगेको छ । जसले गर्दा यसपालिको वार्षिक साधारणसभा (एजीएम) निर्णयबिहीन बन्न पुगेको छ ।

एक वर्षयता दाजु वीरेन्द्रबहादुर बस्नेत र भाइ शिवेन्द्रबहादुर बस्नेतबीच आन्तरिक विवाद चलिरहेको छ । दाजु वीरेन्द्रले बुद्ध एयरमा एकलौटी ढंगले ‘मानोपोली’ गर्दै आइरहेको भाइ शिवेन्द्रको गुनासो छ । दाजुुभाइको आन्तरिक विवाद अदालतमासमेत पुगेको छ ।

बुद्ध एयरले सार्वजनिक सूचना निकालेर वार्षिक साधारणसभा (एजीएम) पुस २७ गते बोलाएको थियो । उक्त एजीएममा सबै सञ्चालकहरू उपस्थित भए । तर, एक वर्ष पहिलेदेखि सुरु भएको दाजुभाइ विवादले कम्पनीको तर्फबाट निर्णयार्थका लागि प्रस्तुत गरिएका एजेन्डा पारित हुन सकेनन् । प्रस्तुत एजेन्डामा ४० प्रतिशत सेयरधनीहरूको तर्फबाट एजीएममा सहभागी भएका प्रतिनिधिहरूले इन्कार गरे । 

त्यसपछि एजीएममा प्रतिवेदन र आर्थिक विवरणहरू पारित हुन सकेको नसकेको स्रोतले जानकारी दियो । शिवेन्द्रले पनि एजीएमबाट कुनै पनि निर्णय हुन नसकेको बताए ।

“दाइहरूले हामीलाई पेलेर जान खोजे । एजीएममा प्रस्तावहरू प्रस्तुत गरियो, हामीले इन्कार गर्‍यौं,” उनले भने, “भोटिङ भयो हामीले सबैमा इन्कार गर्‍यौं । फाइनान्सिएल कुरामा हामीले ‘नोट अफ डिसेन्ट’ लेखेका छौं । त्यसको जवाफ मागिरहेका छौं । त्यसका लागि फाइल गर्दैछौैं ।”

कसरी सुरू भयो दाजुभाइबीचको विवाद ?

शिवेन्द्र बुद्ध एयरका संस्थापक सुरेन्द्रका कान्छा छोरा हुन् । वीरेन्द्र जेठा छोरा हुन् ।  सुरुमा बुबा सुरेन्द्रको नाममा बुद्ध एयरको सेयर स्वामित्व ८० प्रतिशत थियो । उनका जेठा छोरा वीरेन्द्रको नाममा २० प्रतिशत सेयर थियो ।

बुबा सुरेन्द्रबहादुरको निधन भएसँगै उनका छोराहरू (वीरेन्द्र र शिवेन्द्र)बीच सम्पत्तिका विषयमा विवाद भएको हो । बुद्ध एयर २५ वर्षेदेखि नेपाली आकाशमा उडान भर्ने सबैभन्दा ठूलो निजी विमानसेवा कम्पनी हो । उसले १७ वटा एटीआर विमानबाट सेवा दिइरहेको छ । उसले राष्ट्रिय र अन्तर्राष्ट्रिय दुवै क्षेत्रमा उडान भर्दै आएको छ । बुद्ध एयरले नेपालका १४ स्थान र भारत र भुटानमा (चार्टर्ड) पनि उडान गर्दै आएको छ । 
 
शिवेन्द्रले गत वैशाख २७ गते पत्रकार सम्मेलन गरी शिवेन्द्रले ४० प्रतिशत सेयरधनीको हक खोसिएको जिकिर गरेका थिए । त्यसपछि बुद्ध एयरले शिवेन्द्रबहादुर बस्नेतसँग सम्बन्ध नरहेको जानकारी गराएको थियो ।
 
सुरेन्द्रको निधनपछि उनको नाममा रहेको बुद्ध एयरको ८० प्रतिशत सेयरमध्ये ४०–४० प्रतिशत दुई भाइको भागमा परेको थियो । शुरुमै वीरेन्द्रसँग पहिला २० प्रतिशत सेयर थियो । बाँडफाँडपछि वीरेन्द्रको स्वामित्व ६० प्रतिशत पुग्यो । बाँकी ४० प्रतिशत सेयर स्वामित्व शिवेन्द्रका परिवारका सदस्यको नाममा छ ।

शिवेन्द्र लामो समयदेखि अमेरिकामै बसोबास गर्छन् । उनी २०५६ सालमा बुद्ध एयरबाट अलग भएका थिए । उनी परिवारका सदस्यको सेयर अख्तियारी लिँदै दाजुसँग हिसाब–किताब माग गर्न आएका हुन् ।