काठमाडौं । कृषि उत्पादन, उद्यमशीलता र बाँझो जमिनको उत्पादनशील उपयोगसँग सम्बन्धित विषयमा श्रम, रोजगार तथा सामाजिक सुरक्षा मन्त्रालयले कनेक्ट किसान, मौलिक बजार, डिग फर नेपाललगायत संघ–संस्थासँग विशेष छलफल सम्पन्न गरेको छ ।

श्रममन्त्री शरदसिंह भण्डारीको अध्यक्षतामा मंगलबार सम्पन्न उक्त छलफल कार्यक्रममा मन्त्रालयका सचिवालय टोली, वैदेशिक रोजगार विभागका महानिर्देशक कमलप्रसाद भट्टराई, राष्ट्रिय सीप विकास प्रतिष्ठान भैँसेपाटीका पदाधिकारीहरू तथा अन्य सरोकारवालाको सहभागिता थियो ।

बैठकमा ‘डिग फर नेपाल’ अभियानका महासचिव सुमन दाहालले युवालाई कृषि–आधारित उद्यमशीलतामा आकर्षित गर्ने रणनीति प्रस्तुत गर्दै ‘एक पालिका, एक उत्पादन ब्रान्डिङ’ अवधारणा अन्तर्गत स्थानीय खरिद–बिक्री केन्द्र (मौलिक बजार) र स्थानीय परिकारमा आधारित रैथाने स्वादघर (मौलिक भान्छाघर) स्थापना गर्नुपर्ने धारणा राखे । साथै विद्यालय तहबाटै कृषि र उद्यमशीलताको शिक्षा दिनुपर्ने र स्थानीय उत्पादनको प्रवर्द्धनमार्फत आर्थिक सशक्तीकरण गर्नुपर्नेमा जोड दिए ।

त्यसैगरी, कनेक्ट किसानका निर्देशक राजन दाहालले कक्षा कोठाबाटै उद्यमशीलता सिकाउने, वैज्ञानिक कृषि प्रविधिको प्रयोग बढाउने, व्यावसायिक कृषिसम्बन्धी तालिम सञ्चालन गर्ने र युवालाई सीपयुक्त उद्यमीका रूपमा विकास गर्ने योजनाहरू प्रस्तुत गरे ।

बैठकमा केन्द्र, प्रदेश र स्थानीय सरकारबीच नीति, कार्यक्रम तथा स्रोतको समन्वय गर्दै कृषि, रोजगारी र सीप विकासमा सहकार्य गर्न सकिने निष्कर्ष निकालिएको थियो । छलफलमा बाँझो जमिनको उत्पादनशील उपयोग, युवालाई कृषिमा सहभागी गराउँदै स्वदेशमै उद्यमशील अवसर सिर्जना गर्ने सम्भावनाबारे पनि गहन छलफल भएको थियो ।

श्रम मन्त्रालयले समन्वयकारी ढ‌गबाट रोजगारी सिर्जना, युवाशक्ति परिचालन र कृषिको आधुनिकीकरणमार्फत राष्ट्रिय उत्पादन वृद्धि गर्ने नीति अवलम्बन गरिरहेको स्पष्ट सन्देश उक्त छलफलबाट प्रस्टिएको छ ।

सरकार र निजी क्षेत्रको साझेदारीमा अघि बढाइने यी कार्यक्रमले राष्ट्रिय रोजगारी प्रवर्द्धन अभियानलाई थप सुदृढ बनाउने अपेक्षा गरिएको छ ।