काठमाडौं । अन्तर्राष्ट्रिय सम्बन्ध र पर्यटन समितिलगायत तीनवटा संसदीय समितिको बैठक आज बस्दै छ । 

अन्तर्राष्ट्रिय सम्बन्ध र पर्यटन समितिको बैठकमा नेपाल वायु सेवा निगमको जहाजमा देखा परेका समस्याका विषयमा छलफल गर्ने कार्यसूची छ । बैठक बिहान ११ बजे बस्नेछ । 

शिक्षा, स्वास्थ्य तथा सूचना प्रविधि समितिको बैठक बस्दै छ । स्वास्थ्य तथा जनसंख्या मन्त्रालयको कार्यक्रम कार्यान्वयनको अर्धवार्षिक प्रगति एवं पुँजीगत खर्चका विषयमा छलफल हुनेछ । 

मन्त्रालसँग सम्वन्धित गुनासा र समाधानका लागि भएका प्रयासको विषय पनि बैठकको कार्यसूची छ । बैठक बिहान साढे ११ बजे बस्नेछ । 

प्रत्यायोजित व्यवस्थापन तथा सरकारी आश्वासन समितिको बैठक पनि आजै बस्दै छ । बैठकमा समितिको वार्षिक प्रतिवेदन, त्रिभुवन विश्वविद्यालय ऐन, २०४९ अन्तर्गत बनेका प्रत्यायोजित विधायनहरूको अध्ययनबाट देखिएका विषयहरूको प्रारम्भिक अध्ययन प्रतिवेदनका विषयमा छलफल हुने संसद् सचिवालयले जनाएको छ । बैठक दिउँसो साढे १२ बजे बस्नेछ ।