काठमाडौं । एएफसी एसियन कपमा इराकले जापानविरुद्ध २–१ को सनसनीपूर्ण जित निकालेको छ । 

शुक्रबार कतारको इजुकेशन सिटी रंगशालामा सम्पन्न खेलमा प्रतियोगिताकै सबैभन्दा सफल टिमविरुद्ध जित दिलाउन इराकका आयुमेन हुसैनले नै दुवै गोल गरे । जापानका वाटरु एन्डोले गोल फर्काए पनि टिमको हार टार्न सकेनन् ।

खेलको पाँचौँ मिनेटमा हुसेनले गोल गर्दै इरानलाई अग्रता दिलाएका थिए । यस्तै, पहिलो हाफको इन्जुरी समयमा हुसेनले नै इराकको अग्रता दोब्बर बनाए । 

खेलको इन्जुरी समयमा एन्डोले गोल गर्दै खेल रोमाञ्चक बनाए पनि जापानको हार टार्न सकेनन् ।

प्रतियोगितामा जापानको यो पहिलो हार हो । जितसँगै दुई खेलबाट ६ अंक जोडेको इराक प्रिक्वार्टरफाइनल प्रवेश गरेको छ । समान खेलबाट तीन अंक जोडेको जापान तालिकाको दोस्रो स्थानमा छ ।

प्रतियोगिताको इतिहासमा हालसम्म सबैभन्दा धेरै उपाधि जितेको जापान चारपटकको च्याम्पियन हो । यस्तै, इराकले पनि सन् २००७ को संस्करण जितेको थियो ।