काठमाडौं । केपी ओली कप फुटबल प्रतियोगिताको दोस्रो संस्करणमा दुई विदेशी टिमले सहभागिता जनाउने भएका छन् ।

आयोजक नेकपा (एमाले) निकटको युवा संगठन राष्ट्रिय युवा संघ नेपालले बुधबार पत्रकार सम्मेलनमार्फत प्रतियोगितामा १० टिमले सहभागिता जनाउने र त्यसमध्ये दुई टिम विदेशका हुने बताएको हो । आयोजकका अनुसार प्रतियोगितामा दुई विदेशी, एक आयोजक र सात टिम सहिद स्मारक ‘ए’ डिभिजन लिगको क्लबहरूको सहभागिता हुनेछ । 

“भारत र भुटानका गरी चार–पाँच ओटा टिमलाई सहभागिताको निमन्त्रणा पठाएका छौँ । सबै क्लबले सकारात्मक प्रतिक्रिया दिएका छन्,” संघका अध्यक्ष क्षितिज थेवेले भने, “त्यसमध्ये दुई टिमलाई प्रतियोगितामा सहभागी गराउनेछौँ । प्रतियोगिामा विदेशका दुई, आयोजक केपी एफसी र सात घरेलु क्लब गरी १० टिमले प्रतिस्पर्धा गर्नेछन् ।”

अध्यक्ष थेवेले कुन–कुन विदेशी टिम हुनेछन् भन्नेबारे भने तय भइनसकेको बताए । यस्तै, उनले प्रतियोगिताको फाइनलबाहेकका सबै खेल दर्शकका लागि निःशुल्क रहेको बताए । फाइनल खेलका लागि भने टिकेटिङ पार्टनरको लागि संघले खल्तीसँग सम्झौता गरेको छ । फाइनल खेलको टिकट मूल्य भने खुलाइएको छैन । संघले अन्तिम खेलको टिकटबाट उठेको रकममध्येको पाँच प्रतिशत सहयोग गर्ने समेत घोषणा गरेको छ ।

‘केपी ओली कप’को दोस्रो संस्करण फागुन ११ देखि २० गतेसम्म आयोजना हुने तालिका छ । प्रतियोगिताको फाइनलबाहेक सबै खेल च्यासलस्थित एन्फाको मैदान र सातदोबाटोस्थित एन्फा मुख्यालयमा हुने छ । फाइनल खेल भने दशरथ रंगशालमा हुनेछ । 

प्रतियोगिताको विजेताले ११ लाख र दोस्रो टोलीले पाँच लाख रुपैयाँ पाउने छ । यसैगरी, उत्कृष्ट खेलाडीले एक लाख रुपैयाँ पाउने छन् । उत्कृष्ट गोलरक्षकर, सर्वाधिक गोलकर्ता र उदीयमान खेलाडीले समान ५० हजार रुपैयाँ पाउने छन् । हरेक खेलको ‘म्यान अफ दी म्याच’ले १५ हजार रुपैयाँ प्राप्त गर्नेछन् । यस्तै, प्रत्येक खेलको विजेता टिमले २५ हजार रुपैयाँ ‘म्याच मनि’ पाउने छ ।

यसअघि प्रतियोगिताको पहिलो संस्करणको फाइनलमा मच्छिन्द्र क्लबले सातदोबाटो युथ क्लबलाई सडनडेथमा हराएर उपाधि जितेको थियो ।