काठमाडौं । एएफसी एसियन कपमा प्रतियोगिताकै सबैभन्दा सफल टोली जापानले विजयी सुरुआत गरेको छ । आइतबार भएको समूह ‘डी’को खेलमा जापानले भियतनामविरुद्ध ४–२ को रोमाञ्चक जित निकालेको हो ।

कतारको दोहास्थित अल गुमामा रंगशालामा भएको खेलमा जापानलाई जित दिलाउन ताकुमी मिनामिनोले दुई गोल गरे । यस्तै, केइतो नाकामुरा र अयासे युइदाले समान एक गोल गरे । भियतनामका एन्गुएन डिन्ह बाक र फाम तुएन हाइले गोल फर्काएका थिए ।

खेलको ११औँ मिनेटमा मिनामिनोले गोल गर्दै जापानलाई अग्रता दिलाएका थिए । तर, जापानको यो अग्रता लामो समय टिक्न सकेन । त्यसको पाँच मिनेटपछि नै डिन्ह बाकले गोल गर्दै भियतनामलाई खेलमा फर्काएका थिए । ३३औँ मिनेटमा तुएन हाइले गोल गर्दै भियतनामलाई अग्रता दिलाएका थिए । तर, पहिलो हाफको अन्तिम मिनेटमा मिनामिनोले नै गोल गरेपछि जापान खेलमा फर्किएको थियो ।

पहिलो हाफको इन्जुरी समयमा नाकामुराले गोल गर्दै जापानलाई ३–२ को अग्रता दिलाएका थिए । यस्तै, खेलको निर्धारित समय सकिन पाँच मिनेट बाँकी रहँदा युइदाले गोल गरेपछि जापानले ४–२ को जित सुनिश्चित गरेको हो ।

जितसँगै तीन अंक जोडेको जापान तालिकाको शीर्ष स्थानमा छ । हारबाट प्रतियोगिताको सुरुआत गरेको भियतनाम तालिकाको पुछारमा छ । यो समूहमा जापान र भियतनामसँगै इन्डोनेसिया र इराक छन् ।