गाजा । गाजापट्टीमा जारी इजरायली आक्रमणबाट मृत्यु हुने प्यालेस्टाइनीको संख्या बढेर २२ हजार ७२२ पुगेको छ ।

गाजास्थित स्वास्थ्य मन्त्रालयले शनिबार जनाएअनुसार, इजरायली सेनाको आक्रमणबाट पछिल्लो २४ घण्टामा १२२ प्यालेस्टाइनीको ज्यान गएको छ । २५६ जना घाइते भएका छन् ।

गएको अक्टोबर ७ को आक्रमणयता मृत्यु हुनेको कुल संख्या २२ हजार ७२२ पुगेको छ । घाइतेको संख्या ५८ हजार १६६ पुगेको छ ।

यसैबीच, इजरायली सेनाका प्रवक्ता अविचाय अद्राईले शनिबार सेनाले गाजा सहरको एउटा क्षेत्रमा छापा मारेको बताएका छन् ।

प्यालेस्टाइन शरणार्थीका निम्ति संयुक्त राष्ट्रसंघ एजेन्सीसँग सम्बन्धित क्लिनिक झोलाभित्र हमासले लुकाएका शंकास्पद सैन्य सामग्री र विस्फोटक पदार्थ भेटिएको उनले बताए । रासस/सिन्ह्वा