विराटनगर । कोसी प्रदेशका सांसदले मंगलबार सदनको शून्य समयमा विकाससँग सम्बन्धित विषय उठान गरेका छन् ।

राप्रपाकी सांसद गीतारानी महतोले सीमान्तकृत तथा पिछडावर्गलाई आरक्षणको व्यवस्था गर्न माग गरिन् । नेकपा (माओवादी केन्द्र)की सांसद बन्दना झागडले गौरादहदेखि सरङपाडा सडक तीन वर्षदेखि निर्माण थालिए पनि काम रोकिएको भन्दै सरकारको ध्यानाकर्षण गराइन् ।

नेकपा (एमाले)की सांसद यशोदा कायस्थले धरानस्थित बीपी कोइराला स्वास्थ्य विज्ञान प्रतिष्ठान अस्तव्यस्त बनेको बताउँदै सुधारको माग गरिन् । उनले भनिन्, “मुटुरोग र क्यान्सर उपचार व्यवस्था गर्न २०७३ मा काम सुरु भए पनि संरचना निर्माणको काम लथालिंग भएको छ ।”

उनले पटक–पटक काम रोकिँदा नयाँ भवन अलपत्र बनेको भन्दै चासो दिन सरकारको ध्यानाकर्षण गराइन् । ‘बीपी प्रतिष्ठानको नयाँ भवन कहिले पूरा हुन्छ ?’ भन्दै उनले प्रश्न गरिन् ।

एमालेकै सांसद राधाकृष्ण खनालले हात्तीले किसानले उत्पादन गरेको बालीनाली खाने र ज्यानको समेत क्षति गर्ने गरेको बताए । झापाको शिवसताक्षी नगरपालिकामा हात्तीले दुःख दिएको उनले सुनाए ।

हात्तीको आक्रमणमा परी स्थानीय मेघराज राईको मृत्यु भएको भन्दै सांसद खनालले दुःखमा रहेको विपन्न परिवारलाई सहयोग गर्ने वातावरण बनाउन माग गरे ।

राप्रपाकी सांसद सविना बजगाईंले झापाको बुद्धशान्ति बर्नेमा मदन भण्डारी लोकमार्गका कारण ६० परिवार विस्थापित हुने अवस्था आएको बताइन् । उनले भनिन्, “जनता आवासको अधिकारबाट वञ्चित हुनु हुँदैन । सडक केही परबाट लगे घर बचाउन सकिन्छ ।”

एमाले सांसद सिर्जना राईले कृषिक्षेत्रमा लगानी बढाउन आवश्यक रहेको बताइन् । भोजपुर रंगशाला निर्माण सम्पन्न भए पनि सञ्चालनमा नल्याइएको उनले उल्लेख गरिन् ।