काठमाडौं । व्यवसायी अजयराज सुमार्गीले सरकारलाई कर तिर्न अटेर गरेका छन् । उनको स्वामित्वमा रहेको मुक्ति श्री प्रालिले २० करोड ३५ लाख रुपैयाँभन्दा बढी कर बुझाउन बाँकी रहेको आन्तरिक राजस्व कार्यालयले जनाएको छ ।
 
लामो समयदेखि बक्यौता कर नतिरेपछि राजस्व कार्यालयले आउँदो १५ दिनभित्र कर बुझाउन उनलाई समय दिएको छ । 

कर नबुझाए बैंक खाता र घरजग्गा रोक्का गरी लिलामी प्रक्रिया अघि बढाउने चेतावनी कार्यालयले दिएको छ । यस्तै मुलुकबाहिर जानसमेत रोक्ने जानकारी कर कार्यालयले दिएको छ ।

नवीकरण शुल्क बुझाउन नसकेपछि सुमार्गीको स्वामित्वमा रहेको नेपाल स्याटलाइट टेलिकम कम्पनीको लाइसेन्स सरकारले खारेज गरेको छ । उनले हेलो नेपाल ब्रान्डबाट सीमित मोबाइल सेवा सुरु गरेका थिए । 

सुमार्गी उच्च राजनीतिक पहुँच भएका रहस्यमयी व्यवसायीका रूपमा चिनिन्छन् ।  छोटो समयमा उनले गरेको अस्वभाविक आर्थिक विस्तारको राज अहिलेसम्म खुलेको छैन ।

सुमार्गीले विदेशबाट प्रत्यक्ष वैदेशिक लगानीका रूपमा ठूलो रकम नेपाल भित्र्याएको आरोप लाग्दै आएको थियो । 

उनले ट्याक्स हेभन मुलुक भर्जिन आइल्यान्डबाट स्रोत नखुलेको रकम नेपाल ल्याउने गरेको आरोप लाग्दै आएको थियो । पूर्वप्रधानमन्त्री पुष्पकमल दाहाल ‘प्रचण्ड’निकटमा रहेर चर्चा बटुलेका व्यवसायी सुमार्गी अहिले गुमनाम छन् ।