काठमाडौं । क्रिकेटर सन्दीप लामिछानेविरुद्धको जबरजस्ती करणी मुद्दामा जाहेरवाला र सरकारी वकिलको बहस सकिएको छ । आजको बहस सकिएपछि ‘हेर्दा हेर्दै’मा राखिएको छ । काठमाडौं जिल्ला अदालतका न्यायाधीश शिशिरराज ढकालको इजालासमा गत आइतबारबाट सन्दीपविरुद्धको मुद्दामा सुनुवाइ सुरु भएको थियो । 

सरकारी वकिलबाट दुईजना र जाहेरवालाबाट आठजनाले बहस गरेका छन् । सन्दीप पक्षका वकिलमध्ये मुरारी सापकोटाले मात्र बहस गरेका छन् । सापकोटाले जम्मा २० मिनेट मात्र बहसका लागि समय पाएको भन्दै भोलि पनि बहस निरन्तर हुने जानकारी दिए । 

उनका अनुसार सन्दीपका पक्षबाट ६ जनाले बहस गर्दैछन् । सन्दीपका पक्षका वकिलको बहसपछि जाहेरवाला र सरकारी वकिलका तर्फबाट जवाफी बहस हुनेछ । जवाफी बहस सकिएपछि न्यायाधीशले फैसला सुनाउनेछन् । 

यो मुद्दामा गत आइतबारदेखि सुनुवाइ जारी छ । न्यायाधीश ढकालको इजलासमा अन्तिम सुनुवाइको सुरुआतमा जाहेरवालाका तर्फबाट बहस सु्रु भएको अदालतका श्रेस्तेदार रामु शर्माले जानकारी दिए । जाहेरवाला र सरकारी वकिलको बहस बुधबार खाजा समयअघि सक्ने भनिएकोमा खाजा समयपछिसम्म पनि जारी रहेको थियो । 

बुधबार अन्तिम बहस सन्दीपका वकिल मुरारी सापकोटाले गरेका हुन् । सन्दीपका वकिलको बहस लम्बिएमा फैसला शुक्रबारका लागि सर्नेछ । तर, बहस छोटो भएर जवाफी बहस सकिएमा भने बिहीबार नै फैसला आउने बताइएको छ । 

पीडित भनिएकी गौशाला २६ (छ) को उजुरीमा अनुसन्धान गरी प्रहरीले प्रतिवेदन बुझाएपछि सन्दीपविरुद्ध ०७९ कात्तिक १४ मा जिल्ला अदालतमा मुद्दा दायर भएको थियो । त्यसबेला पुर्पक्षका लागि थुनामा पठाउने आदेश भएकोमा सन्दीप उच्च अदालतको आदेशबाट देशबाहिर जान नपाउने तर स्वदेशमा हुने प्रतियोगितामा भाग लिन पाउने आदेश लिएर थुनामुक्त भएका थिए । 

उच्च अदालतको आदेशविरुद्ध पुनः सर्वोच्चमा पुनरावेदन गरेका सन्दीपलाई सर्वोच्चले अनुमति लिएर विदेश समेत खेल्न जान पाउनेगरी आदेश गरेपछि उनी खेल जीवनमा नियमित छन् । सन्दीपको मुद्दामा यसअघि पटक–पटक अन्तिम सुनुवाइ भन्दै इजलास तोकिएपनि सुनुवाइ हुन सकेको थिएन । पटक पटक मुद्दा सर्दा यो मुद्दाको ३४औँ पेसी बुधबार तोकिएको हो । बिहीबार ३५औँ  पेसीमा सुनुवाइ हुन्छ । पीडित भनिएकी गौशाला २६ (छ) को उमेर एकीन गर्न पटक पटक आदेश भएका छन् । 

जिल्ला अदालतका तत्कालीन एक नम्बर न्यायाधीश राजु खतिवडाको इजलासले गत साउनमा पीडितकी आमाको उमेर एकीन गर्ने आदेश गरेको थियो । पीडितकी आमाको उमेर एक ठाउँमा २०३५ रहेकोमा अर्को ठाउँमा ०५३ भएको पाएपछि आमाको उमेर एकीन गर्ने आदेश भएको थियो ।

यसअघि कात्तिक २३ मा न्यायाधीश केशवराज घिमिरेको इजालासले मंसिर २२ भित्र दुवै पक्षका वकिलहरूलाई लिखित बहस नोट पेस गर्न आदेश गरेको थियो । मंसिर २४ मा न्यायाधीश पदमराज पाण्डेको इजलासमा पेसी चढेपनि सन्दीपका वकिलले स्थगित गरेका थिए । दुवै पक्षको बहसनोट आइसकेकाले अब संक्षिप्त सुनुवाइ सकिएपछि फैसला गर्नेछ ।