काठमाडौं । राष्ट्रियसभाको निर्वाचन आगामी माघ ११ गते हुँदै छ । निर्वाचन आयोगका अनुसार आउँदो पुस २३ गते उमेदवारले मनोनयनपत्र दर्ता गर्ने कार्यक्रम छ । 

उमेदवारको मनोनयनपत्र दर्ता गर्दा राष्ट्रियसभा सदस्य निर्वाचन ऐन, २०७५, राष्ट्रियसभा सदस्य निर्वाचन नियमावली, २०७६ र राष्ट्रियसभा सदस्य निर्वाचन निर्देशिका, २०७६ बमोजिम तोकिएको कागजात पेस गर्नुपर्ने आयोगले जनाएको छ । 

उमेदवारले मनोनयन दर्ता गर्दा नेपाली नागरिकताको प्रमाणपत्रको प्रतिलिपि अनिवार्य पेस गर्नुपर्ने आयोगले जनाएको छ । मतदाता नामावली ऐन, २०७३ बमोजिम कुनै गाउँपालिका वा नगरपालिकाको अन्तिम मतदाता नामावलीमा नाम समावेश भएको निस्सा, धरौटी रकम जम्मा गरेको रसिद वा भौचर बुझाउनुपर्ने आयोगले जारी गरेको विज्ञप्तिमा उल्लेख छ ।