![पहिलो हाफमा काठमाडौंविरुद्ध ललितपुर २–० ले अगाडि](https://12khari.top/uploads/posts/Lalitpur-1-1702647238.jpg)
काठमाडौं । नेपाल सुपर लिग (एनएसएल) को इलिमिनेटरमा साविक विजेता काठमाडौं रेजर्सविरुद्ध ललितपुर सिटी एफसीले पहिलो हाफमा २–० को अग्रता बनाएको छ ।
मंगलबार त्रिपुरेश्वरस्थित दशरथ रंगशालामा जारी खेलमा ललितपुरलाई अग्रतामा राख्न इमोह एजिकील र पापा इबोउ केबेले गोल गरे ।
३६औँ मिनेटमा एजिकीलले गोल गर्दै ललितपुरलाई अग्रतामा राखे । पापा इबो केबेको प्रहार काठमाडौंका गोलकिपर अन्जल श्रेष्ठले बचाए पनि नियन्त्रण गर्न नसक्दा एजिकीलले ट्याप इन गोल गरे ।
पहिलो हाफका लागि एक मिनेट बाँकी रहँदा ललितपुरका केबेले अग्रता दोब्बर पारे ।
त्यसअघि दुवै टिमले केही अवसर बनाए पनि सदुपयोग गर्न सकेनन् । खेलको पाँचौँ मिनेटमा काठमाडौंका सुशील कुमार यादवको क्रस मार्की खेलाडी हिसुब थपलियासम्म पुग्न नपाउँदै ललितपुरका अश्विन घोरासइनीले क्लियर गरिदिए ।
खेलको ११औँ मिनेटमा ललितपुरले गोलको पहिलो अवसर सिर्जना गर्यो । तर, दिनेश हेन्जजको प्रहारले पोस्टको दिशा लिन नसक्दा ललितपुरले अग्रता लिन सकेन । काठमाडौंका किङ्गे जुनियरको अनियन्त्रित बल खोस्दै इमोन एजिकीलले दिएको कट्ब्याक कुनै पनि निगरानीमा नरहेका दीनेशले सदुपयोग गर्न सकेनन् ।
निर्धारित हाफ सकिन ६ मिनेट बाँकी छँदा काठमाडौंले सेटपीस अवसरमा गोल गर्न सकेन । शोखरुख एमको फितलो फ्रिकिक प्रहार ललितपुरका गोलकिपर जेफेरी विली मार्सेलले सहजै बचाए ।
काठमाडौं र ललितपुरबीचको विजेताले बिहीबार दोस्रो क्वालिफायर्समा पोखरा थन्डर्सको सामना गर्नेछ । सोमबार भएको पहिलो क्वालिफायर्समा पोखराले धनगढी एफसीविरुद्ध टाइब्रेकरमा ४–३ को हार ब्यहोरेको थियो ।