![इलिमिनेटरमा साविक विजेतालाई ललितपुरको चुनौती](https://12khari.top/uploads/posts/Lalitpur-1-1702647238.jpg)
काठमाडौं । नेपाल सुपर लिग (एनएसएल) को इलिमिनेटरमा आज साविक विजेता काठमाडौं रेजर्ससामु ललितपुर सिटी एफसीले चुनौती प्रस्तुत गर्दै छ ।
प्रतियोगितामा काठमाडौं तेस्रो र ललितपुर चौथो स्थानमा रहँदै प्लेअफमा आएका हुन् । तेस्रो स्थानको काठमाडौंले आठ खेलबाट समान तीन खेलमा जित र बराबरीसँगै दुई खेलमा हारको नतिजासहित १२ अंक जोड्दै प्लेअफमा स्थान बनाएको हो । चौथो स्थानको ललितपुरले लिग चरणमा दुई जित, चार बराबरी र दुई खेलमा हार बेहोरेको थियो ।
प्लेअफको पूर्वसन्ध्यामा आयोजित पत्रकार सम्मेलनमा काठमाडौंका मुख्य प्रशिक्षक बालगोपाल महर्जन टोलीको लक्ष्य उपाधि रक्षा गर्ने रहेको बताएका थिए ।
“हाम्रो मुख्य लक्ष्य भनेकै उपाधि रक्षा हो । ललितपुरलाई हराएर इलिमिनेटर खेल्ने भएका छौँ । यही स्प्रिट र इफोर्डको साथ खेल्छौँ । अरू टोली पनि उत्कृष्ट छन् । हामी लालितपुरविरुद्ध शतप्रतिशत दिने छौँ, महर्जनले भने ।”
ललितपुरका मुख्य प्रशिक्षक इयान गिलानले काठमाडौंविरुद्ध उत्कृष्ट प्रदर्शनको गर्ने आशा व्यक्त गरेका थिए ।
“गर या मर अवस्थामा छौँ । तर हामी धेरै तनाव नलिई सकारात्मक भएर खेल्छौँ । पछिल्लो केही खेलमा राम्रो प्रदर्शन भए पनि गोल भने निस्कन सकिरहेको छैन,” गिलानले भने, “हामी गल्तीहरूलाई सुर्धादै उत्कृष्ट प्रर्दशन गर्ने प्रयास हुने छौँ । जस्ले जित्छ त्यही टोली अगाडि बढ्छ ।”
यसअघि लिग चरणको अन्तिम खेलमा काठमाडौंले ललितपुरलाई १–० ले हराएको थियो ।
त्रिपुरेश्वरस्थित दशरथ रंगशालामा हुने यो खेल अपराह्न ५ः३० बजेदेखि सुरु हुने छ । आजको खेलमा जित निकाल्ने टिमले फाइनल प्रवेशका लागि दोस्रो प्लेअफमा पोखरा थन्डर्ससँग खेल्ने छ ।
यसअघि सोमबार भएको पहिलो प्लेअफमा धनगढी एफसीसँग पेनाल्टी सुटआउटमा ४–३ ले पराजित भएपछि पोखराले दोस्रो प्लेअफ खेल्न पर्ने भएको हो ।