![अतिरिक्त समयमा धकेलियो पोखरा र धनगढीबीचको क्वालिफायर](https://12khari.top/uploads/posts/1-Dhangadhi-Pokhara-1703508545.jpg)
काठमाडौं । नेपाल सुपर लिग (एनएसएल) मा पोखरा थन्डर्स र धनगढी एफसीबीचको पहिलो क्वालिफायर अतिरिक्त समयमा धकेलिएको छ ।
त्रिपुरेश्वरस्थित दशरथ रंगशालामा जारी खेलको निर्धारित समयमा दुवै टिमले १–१ को बराबरी खेलेपछि खेल अतिरिक्त समयमा धकेलिएको हो ।
खेलको पाँचौँ मिनेटमा आयुश घलानले गोल गर्दै पोखरलाई अग्रतामा राखेका थिए । मोसेस त्वमले लेफ्ट साइडबाट गरेको क्रसलाई धनगढीको रक्षकले क्लियर गर्न नसक्दा अनमार्क रहेका आयुशले ६ यार्ड बक्सबाट बललाई सहजै पोस्टको दिशा दिएपछि पोखराले अग्रता बनाएको थियो । पहिलो हाफभर पोखराले १–० को अग्रता बनाए पनि दोस्रो हाफमा धनगढी खेलमा फर्कियो ।
५४औँ मिनेटमा कप्तान देवेन्द्र तामाङले गोल गर्दै धनगढीलाई खेलमा फर्काए । कमल श्रेष्ठले राइट साइडबाट गरेको क्रसमा देवेन्द्रले हेडर गोल गरे । देवेन्द्रको यो गोलमा पोखराका गोलकिपर प्रिसो प्रतिक्रियाविहीन बनेका थिए ।
खेलको निर्धारित समयमा दुवै टिमले केही अवसर बनाए पनि सदुपयोग गर्न सकेनन् । आठौँ मिनेटमा पोखराको अग्रता दोब्बर बनाउने सुनौलो अवसर धनगढीका गोलकिपर मोहमद ताहा बाधक बने । आयुश घलानले पेनाल्टी बक्सभित्रबाट तीन रक्षकलाई चकित पार्दै निकालेको ‘ब्याक पास’ मा दीपेश आले मगरको प्रहारलाई ताहाले उत्कृष्ट बचाउ गरे ।
१९औँ मिनेटमा पोखराका मोसेस त्वमको प्रहार पोस्ट नजिकबाट बाहिरियो । स्टेफन पापा एनोरले लेफ्ट साइडबाट गरेको क्रसमा त्वमको ‘भली’ सेकेन्ड बार नजिकबाट बाहिरिएपछि धनगढीको खतरा टरेको थियो ।
२४औँ मिनेटमा अहमद हिजाजीको हेडरमा पोखराका नरेन्द्र चौधरी बाधक बन्दा धनगढी बराबरीमा फर्किन सकेन । अभिषेक गुरुङको राइट साइडबाट गरेको क्रसमा पेनाल्टी बक्सभित्र अनमार्क रहेका अहमद हिजाजीको हेडरलाई गोललाइनबाट नरेन्द्रले छातीले रोक्दै धनगढीको खेलमा फर्किने प्रयासलाई सफल बन्न दिएनन् ।
३१औँ मिनेटमा जोए आइडुको फ्रिकिकमा पुनः धनगढीका गोलकिपरले उत्कृष्ट बचाउ गरे । धनगढीका कप्तान देवेन्द्र तामाङको ह्यान्ड भएपछि पेनाल्टी बक्स बाहिरबाट फ्रिकिक पाएको थियो । जसमा आइडुको लोअर प्रहार राइट साइडमा ताहाले डाइभ हान्दै बललाई जोगाएका थिए । सोही बल पोस्टमा ठोक्किएर रिबाउन्ड आउँदा पोखराका मोसेस त्वम प्रहारका लागि पुगे पनि पुनः ताहाले बललाई नियन्त्रणमा राख्दै खतरा टारे ।
४८औँ मिनेटमा धनगढीको बराबरी गर्ने सुनौलो अवसरलाई पोखराका गोलपिकर प्रिसोले टारे । ५ को प्रहार कप्तान दीनेश राजवंशीले गोललाइनबाट हेडर क्लियर गरे । सोही रिबाउन्डमा हिजाजीले हेडर प्रयास गरे पनि प्रिसोले सहजै नियन्त्रणमा राखे ।
५४औँ मिनेटमा धनगढीका हिजाजीको प्रहारलाई पुनः प्रिसोले विफल बनाए ।
७२औँ मिनेटमा पोखराका फ्रयांकलिन टलाले सुनौलो अवसर सदुपयोग गर्न सकेनन् । पेनाल्टी बक्सबाहिरिबाट सुरजजिउ ठकुरीको फ्रिकिकलाई मोसेस त्वमले हेडमार्फत मिलाइदिएको बलमा टलाको हाफ भली पोस्ट माथिबाट बाहिरिँदा धनगढीको खतरा टरेको हो ।
७९औँ मिनेटमा ओलावाले आफिजको सुन्दर भली प्रहारमा पोखराका प्रिसोले उत्कृष्ट ‘गोलकिपिङ’ को नमुना प्रस्तुत गरे । अभिषेक गुरुङले राइट साइडबाट गरेको क्रसलाई बक्सभित्रका हिजाजीले ‘एक्रोबेटिक’ प्रयास गरे पनि बिट हुँदा ओलावालको भली प्रहारलाई प्रिसोले उत्कृष्ट रुपमा बचाए ।
८३औँ मिनेटमा धनगढीका गोलकिपरले मोहमद ताहाले धनगढीको खतरा टारे । सुरजजिउ ठकुरीले प्रहार गरेको फ्रिकिकमा बक्सभित्रका आइडुको हेडरलाई ताहाले उत्कृष्ट रुपमा विफल बनाए ।
निर्धारित समयको अन्तिम मिनेटमा पोखराका आइडुले ३० यार्डभन्दा परबाट गरेको भली प्रहार बार नजिकैबाट बाहिरिएपछि धनगढीको खतरा गरेको थियो ।
लिग चरणबाट नवीन न्यौपानेको टोली पोखरा शीर्ष स्थानमा रहँदै अन्तिम चारमा आइपुगेको हो । पोखराले आठ खेलमध्ये चारमा जित निकाल्दा तीनमा बराबरी र एक खेलमा हारको नतिजासहित १५ अंक जोडेको थियो ।
दोस्रो स्थानको धनगढीले समान खेलबाट तीन जित, चार बराबरी र एक हारको नतिजासहित १३ अंक जोडेको थियो । धनगढीले एनएसएलको पहिलो संस्करणमा फाइनलसम्मको यात्रा तय गरे पनि काठमाडौं रेजर्ससँग पराजित भएपछि उपविजेतामा खुम्चिएको थियो ।
आजको खेलमा जित निकाल्ने टिमले फाइनलमा स्थान पक्का गर्ने छ । र, हार्ने टिमले भने दोस्रो प्लेअफको मौका पाउने छ ।
हार्ने टोलीले काठमाडौं रेजर्स र ललितपुर सिटी एफसीबीचको इलिमिनेटर विजेतासँग फाइनल प्रवेशका लागि पुनः प्रतिस्पर्धा गर्ने छ ।