![पोखरालाई साविक उपविजेताको चुनौती](https://12khari.top/uploads/posts/Dhangadhi-vs-Pokhara-1703437098.jpg)
काठमाडौं । नेपाल सुपर लिग (एनएसएल) को दोस्रो संस्करणको पहिलो क्वालिफायरमा लिग लिडर पोखरा थन्डर्सलाई साविक उपविजेता धनगढी एफसीले चुनौती प्रस्तुत गर्दै छ ।
लिग चरणबाट नवीन न्यौपानेको टोली शीर्ष स्थानमा रहँदै अन्तिम चारमा आइपुगेको हो । पोखराले आठ खेलमध्ये चारमा जित निकाल्दा तीनमा बराबरी र एक खेलमा हारको नतिजासहित १५ अंक जोडेको थियो ।
दोस्रो स्थानको धनगढीले समान खेलबाट तीन जित, चार बराबरी र एक हारको नतिजासहित १३ अंक जोडेको थियो । धनगढीले एनएसएलको पहिलो संस्करणमा फाइनलसम्मको यात्रा तय गरे पनि काठमाडौं रेजर्ससँग पराजित भएपछि उपविजेतामा खुम्चिएको थियो ।
प्लेअफको पूर्व संध्यामा आयोजित पत्रकार सम्मेलनमा बोल्दै पोखरा थन्डर्सका मुख्य प्रशिक्षक नवीन न्यौपानेले अबको खेल सहज नहुने बताए ।
“प्ले अफमा पुग्न सफल चार टोलीलाई बधाइ छ । सबै टोली बराबर छन् । सबै टोली सेट भइसकेको छ । त्यसैले प्ले अफ खेल्न सहज हुने छैन,” न्यौपानेले भने, “जसले पाएको अवसर सदुपयोग गर्न सक्छ उसैले जित्छ । हामी धनगढीसँग खेल्न तयार छौँ । खेलाडी तयार भएका छन् ।”
यता, धनगढीका मुख्य प्रशिक्षक गत सिजन फाइनलमा हारेको भए पनि यसपटक भने उपाधि जित्ने दाबी गरे ।
“भोलि महत्त्वपूर्ण खेल हुने छ । लिग चरण निकै रोमाञ्चक भयो । बटम टिमले नि पहिलो टोलीलाई हराए । प्लेअफमा पुगेका चारै टोली बलिया छन् । लिगको अन्तिम तीन खेलमा जित निकाल्न सकेनौँ । तर, अब लिग चरणको प्रदर्शनले अर्थ राख्दैन,” राईले भने, “लिग चरणमा जस्तो ससाना गल्ती गर्ने छुट छैन । नक आउट खेल हो हामी उत्कृष्ट प्रदर्शन गर्न प्रयास गर्ने छौँ । गत संस्करणमा फाइनल हारेका थियौँ । यसपटक उपाधि जितेरै छाड्ने छौँ ।”
त्रिपुरेश्वरस्थित दशरथ रंगशालामा हुने खेल अपराह्न ५ः३० बजेदेखि सुरु हुने छ । आजको खेलमा जित निकाल्ने टिमले फाइनलमा स्थान पक्का गर्ने छ । र, हार्ने टिमले भने दोस्रो प्लेअफको मौका पाउने छ ।
हार्ने टोलीले काठमाडौं रेजर्स र ललितपुर सिटी एफसीबीचको इलिमिनेटर विजेतासँग फाइनल प्रवेशका लागि पुनः प्रतिस्पर्धा गर्ने छ ।