काठमाडौं । शीर्ष चारको यात्राबाट बाहिरिसकेको एफसी चितवनसँग २–० ले पराजित भएपछि झापा एफसीको प्लेअफ सम्भावना कठिन बनेको छ ।

शुक्रबार त्रिपुरेश्वरस्थित दशरथ रंगशालामा सम्पन्न खेलमा चितवनलाई जित दिलाउन रफिक अमिनुको नै दुवै गोल गरे । चितवनको जितमा अमिनुसँगै गोलकिपर तथा कप्तान विशाल श्रेष्ठ पनि नायक बने । यो खेलसँगै विशालले राष्ट्रिय टिमबाट सन्न्यासको घोषणासमेत गरे ।

झापाको हारसँगै प्लेअफ समीकरण रोचक बनेको छ । लिग चरणको सबै खेल खेलेको झापा १० अंक जोड्दै अंक तालिकाको चौथो स्थानमा छ । शनिबार वीरगन्ज युनाइटेड एफसी र साविक विजेता काठमाडौं रेजर्सले आफ्ना खेलमा हार बेहोरे मात्रै झापा शीर्ष चारमा अटाउने छ । एक खेल कम खेलेको वीरगन्ज ८ अंकका साथ तालिकाको सातौँ स्थानमा छ । झापालाई प्लेअफमा पुग्न ललितपुरको जितसँगै वीरगन्ज युनाइटेडको हार आवश्यक छ ।

शनिबारको बुटवल लुम्बिनीविरुद्धको जितले वीरगन्जलाई प्लेअफ पुर्‍याउने छ । यस्तै, नौ अंकका साथ छैटौँ स्थानमा रहेको काठमाडौंले आफ्नो अन्तिम खेलमा ललितपुर सिटी एफसीलाई हराए प्लेअफमा स्थान बनाउने छ । ललितपुर १० अंकका साथ तालिकाको तेस्रो स्थानमा छ । प्लेअफ पुग्न काठमाडौंविरुद्ध ललितपुरलाई बराबरीको नतिजा पर्याप्त हुने छ ।

शुक्रबारको यो नतिजासँगै चितवनले प्रतियोगिताको सुखद अन्त्य गर्‍यो । जितसँगै नौ अंक जोड्दै पाँचौँ स्थानमा उक्लिएको चितवन यसअघि नै प्लेअफबाट बाहिरिसकेको थियो ।

झापाविरुद्ध मार्की खेलाडी विमल घर्तीमगरको कर्नरमा चितवनले खेलको सातौँ मिनेटमा अग्रता लियो । विमलको कर्नर बल अमिनुसम्म पुग्नुअघि अफ्रिई अक्वाहले उनलाई हेडमार्फत गोलको मौका मिलाइदिएका थिए । प्राप्त अवसरलाई अमिनुले हेडर नै पोस्टको दिशा दिए । झापाका गोलकिपर स्टेफन क्युपिकले पाँच खेलपछि पहिलो गोल खाएका हुन् ।

खेलको ७६औँ मिनेटमा अमिनुले दोस्रो गोल गरे । मध्यभागबाट एक्लै बल लगेका अमिनुले सुमीतलाई बिट गर्दै सुन्दर गोल गरे । अमिनुको राइट फुटेड प्रहार क्युपिकले बचाउन सकेनन् ।

निर्धारित समय सकिन आठ मिनेट बाँकी छँदा अञ्जनले पेनाल्टीमा चुके । छिरिङ गुरुङबाट फउल भएपछि अञ्जनले टोलीका लागि पेनाल्टी जितेका थिए । त्यसपछि झापाले कुनै पनि अवसर सिर्जना गर्न नसक्दा चितवनले प्रतियोगिताको दोस्रो जित हासिल गर्‍यो ।

शुक्रबार नै भएको पहिलो खेलमा पोखरा थन्डर्स र धनगढी एफसीले १–१ को बराबरी खेलेको थियो । दुवै टोलीले प्लेअफमा स्थान बनाइसकेका छन् ।