काठमाडौं । विलियम ओपुकु अैसेडुको ह्याट्रिकप्रेरित वीरगन्ज युनाइटेड एफसीले साविक विजेता काठमाडौं रेजर्सविरुद्ध ४–१ को सहज जित निकाल्दै नेपाल सुपर लिग (एनएसएल)को दोस्रो संस्करणमा प्ले अफ सम्भावनालाई कायम राखेको छ ।
बिहीबार त्रिपुरेश्वरस्थित दशरथ रंगशालामा सम्पन्न खेलमा वीरगन्जलाई जित दिलाउन औसेडुले ह्याट्रिक गर्दा सुनिल खड्काले एक गोल थपे । काठमाडौंका एन्केनगुय जुनियरले गोल गरेका थिए । साविक विजेताविरुद्ध वीरगन्जले १–० ले पछि परेको अवस्था उल्ट्याँदै तीन अंक पक्का गरेको हो ।
खेलको २१औँ मिनेटमा काठमाडौंले काउन्टर आक्रमणमा फाइदा उठाउँदै गोल गर्यो । तेज तामाङकोे कर्नरलाई सोझै बचाएका गोलकिपर अन्जल श्रेष्ठले काउन्टर अवसर सृजना गरेका थिए । एन्केनगुय जुनियरले कुलदीप कार्कीको पासलाई सदुपयोग गर्दै टोलीलाई अग्रता दिलाए । कुल्दीपले राइट साइडबाट दिएको क्रस तेजसँग डिफ्लेक्ट हुँदै जुनियरसम्म पुगेको थियो । अन्जलको बल एन्केनगुयसम्म पुग्नुअघि काठमाडौंले पाँच पास खेलेको थियो ।
तर, इन्जुरी समयमा विलियम ओपुकु अैसेडुले गोल गर्दै वीरगन्जलाई खेलमा फर्काए । १८ यार्ड बक्सभित्र दीपेश गुरुङको ह्यान्ड भएपछि वीरगन्जले पेनाल्टी पाएको थियो । जसमा ओपुकुले कुनै गल्ति गरेनन् । पहिलो हाफ १–१ को बराबरीमा समाप्त भए पनि दोस्रो हाफमा वीरगन्जले तीन गोल थप्यो ।
दोस्रो हाफको पहिलो मिनेटमा नै सुनिल खड्काले गोल गर्दै वीरगन्जलाई अग्रतामा राखे । दीपेन्क ठकुरीले डिफेन्स लाइनबाट निकालेको लामो पास नियन्त्रणमा राख्दै ओसुवु ओबेडले बल अघि बढाए । ओबेडले लेफ्ट साइड ६ यार्ड बक्स नजिकबाट निकालेको ‘कट ब्याक’लाई काठमाडौंका गोलकिपर अन्जल श्रेष्ठले नियन्त्रणमा राख्न नसकेको बललाई सुनिलले जालीको चुमाए ।
५६औँ मिनेटमा ओपुकुले गोल गर्दै वीरगन्जको अग्रतालाई ३–१ मा पुर्याए । सुशिल लामाले गरेको कर्नर प्रहारमा ओपुकुले हेडर गोल गरेका थिए ।
त्यसको अर्को मिनेटमा नै ओपुकुले ह्याट्रिक गर्दा वीरगन्जले अग्रतालाई ४–१ को सहज अवस्थामा पुर्याएको थियो । सुशिल लामाले डिफेन्स लाइनबाट क्लियर गरेको बललाई फरवार्ड पोजिसनमा रहेका ओपुकुले करिब २५ यार्ड परबाट उत्कृष्ट हाफ भली गोल गरे । जारी सिजन यो प्रतियोगिताकै पहिलो ह्याट्रिक समेत हो ।
यो जितसँगै प्लेअफ पुग्ने सम्भावनालाई कायम राखेको वीरगन्ज सात खेलबाट आठ अंक जोड्दै तालिकाको सातौँ स्थानमा उक्लिएको छ । वीरगन्जसँगको हारले काठमाडौंमाथि भने दबाब थपिएको छ । सात खेलबाट नौ अंक जोडेको काठमाडौं तालिकाको पाँचौँ स्थानमा छ ।
लिग चरणको अन्तिम खेलमा अब वीरगन्जले बुटवल लुम्बिनी एफसी र काठमाडौंले ललितपुर सिटी एफसीविरुद्ध खेल्नेछ ।
त्यसअघि खेलमा दुवै टिमले केही अवसर सदुपयोग गर्न सकेनन् । दोस्रो मिनेटमा पेनाल्टी बक्स बाहिरबाट टोजिडिनोभ कोमीवनले गरेको प्रहार बाहिरिँदा काठमाडौंले पहिलो अवसर खेर फाल्यो ।
निर्धारित समय सकिन ६ मिनेट बाँकी छँदा काठमाडौंले अग्रता दोब्बर बनाउने सुनौलो मौका गुमायो । वीरगंजका दिपेन्क राज सिंहले मार्की खेलाडी हिसुब थपलियालाई बक्सभित्र फाउल गरेपछि काठमाडौंले पेनाल्टी पाएको थियो । तर, प्राप्त पेनाल्टीमा शोखरुख एम चुक्न पुगे । शोखरुखले पहिलो बारमा गरेको प्रहार वीरगंजका गोलकिपर तथा कप्तान दीप कार्कीले बचाए ।
५४औँ मिनेटमा तोजिडिनोभ कोमिवोनको प्रहारलाई वीरगन्जका गोलकिपर दीप कार्कीले विफल बनाए । करिब २५ यार्ड परबाट कोमिवोनको फ्रिकिक प्रहारलाई दीपले बारमाथि फ्याकेका थिए ।
