काठमाडौं । स्पेनिस ला लिगामा लिग लिडर जिरुनाले डिपोर्टिभो अलाभेसविरुद्ध ३–० को सहज जित निकालेको छ ।

मंगलबार स्टाडि म्युनिसिपल डे मोन्टिलिभीमा भएको खेलमा जिरुनालाई जित दिलाउन अर्टेम डोभबीवाइकेले दुई र क्रिस्टियन पोर्टुले एक गोल गरे ।

२३औँ मिनेटमा डोभबीवाइकेले गोल गर्दै जिरुनालाई अग्रतामा राखेका थिए । ४२औँ मिनेटमा पोर्टुले गोल गरेपछि जिरुनाले अग्रता दोब्बर बनाएको थियो । ५९औँ मिनेटमा प्राप्त पेनाल्टीलाई डोभबीवाइकेले सदुपयोग गर्दै जिरुनाको अग्रतालाई ३–० मा पुर्‍याएका थिए ।

जितसँगै तालिकाको शीर्ष स्थानमा उक्लिएको जिरुनाले १७ खेलबाट ४४ अंक जोडेको छ । जिरुनालाई पछ्याइरहेको रियाल मड्रिडको समान खेलबाट ४२ अंक छ । गत सिजनको विजेता बार्सिलोना ३५ अंकसहित तालिकाको तेस्रो स्थानमा छ । जिरुनासँग पराजित अलाभेस १३औँ स्थानमा छ ।