नयाँ दिल्ली । भारतीय प्रधानमन्त्री नरेन्द्र मोदीले आइतबार भारतीय संसद्को तल्लो सदन लोकसभामा सुरक्षा उल्लंघनको घटना ‘अत्यन्त गम्भीर’ भएको बताएका छन् ।

मोदीले यो विषयमा बहस गर्नुपर्ने आवश्यकता नभएको तर यसका पछाडि रहेका व्यक्तिहरू पत्ता लगाउन ‘बृहत् अनुसन्धान’ गर्नुपर्नेमा जोड दिए ।

बुधबार दुई युवकले आगन्तुक दीर्घाबाट लोकसभामा हामफालेर रङको धुलो फ्याँकेका थिए । सोही समयमा एक पुरुष र एक महिला गरी दुईजनालाई प्रहरीले संसद् भवनबाहिरबाट हिरासतमा लिएको थियो ।

घटनामा संलग्न चारबाहेक संदिग्ध अरू दुईजनालाई प्रहरीले पक्राउ गरेको छ । उनीहरूले अनुसन्धानकर्तालाई आफ्नो उद्देश्य मणिपुर हिंसा, बेरोजगारी र किसानको समस्याप्रति ध्यानाकर्षण गराउनु रहेको बताएका छन् ।

विपक्षी सांसदहरूले संघीय गृहमन्त्री अमित शाहसँग संसद्भित्र भएको सुरक्षा उल्लंघनबारे जवाफ दिन माग गर्दै आएका छन् ।

यो विषयले संसद्का दुवै सदनको बैठक अवरुद्ध भएको छ । विपक्षीले गृहमन्त्रीको वक्तव्य माग गरेपछि तल्लो सदनका १३ र राज्यसभाका एक सदस्यलाई निलम्बन गरिएको थियो ।

शनिबार लोकसभाको तल्लो सदनका सभामुखले सुरक्षा उल्लंघनको गहन अनुसन्धानका निम्ति उच्चस्तरीय छानबिन समिति गठन गरिएको बताएका थिए । रासस/सिन्ह्वा