काठमाडौं । झापा एफसीसँग बराबरीमा रोकिएसँगै ललितपुर सिटी एफसीले नेपाल सुपर लिग (एनएसएल) को शीर्ष स्थानमा उक्लिने अवसर गुमाएको छ । एनएसएलको दोस्रो संस्करण जारी रहँदा प्रतियोगिताको यो ५०औँ खेल हो । 

शुक्रबार त्रिपुरेश्वरस्थित दशरथ रंगशालामा सम्पन्न खेलमा झापासँग गोलरहित बराबरी खेल्दै ललितपुरले अंक बाँडेको हो । बराबरीसँगै शीर्ष स्थानमा उक्लिने अवसर गुमाएको ललितपुर ६ खेलबाट १० अंकसहित तालिकाको दोस्रो स्थानमा छ । ललितपुरअघि रहेको धनगढी एफसीले पाँच खेलबाट ११ अंक जोडेको छ ।

प्रतियोगितामा हालसम्म अपराजित रहेको ललितपुरले दुई खेलमा जित र चार खेलमा बराबरीको नतिजा निकालेको छ ।

यता, झापा भने आफ्नो खातामा एक अंक थप्दै तालिकाको छैटौँ स्थानमा यथावत् छ । झापाले ६ खेलबाट सात अंक जोडेको छ । 

मंसिर ८ गतेदेखि सुरु भएको प्रतियोगितामा नौ टिमको सहभागिता छ । प्रतियोगिताको यस सिजनमा काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, एफसी बुटवल लुम्बिनी र पोखरा थन्डर्स सहभागी छन् ।

तस्बिरहरू : हरिशजंग क्षेत्री/बाह्रखरी