काठमाडौं । एफसी चितवनविरुद्ध आफिज ओलावालेको गोल निर्णायक बनेपछि १–० को जित निकाल्दै धनगढी एफसी नेपाल सुपर लिग (एनएसएल)को शीर्ष स्थानमा उक्लिएको छ ।

त्रिपुरेश्वरस्थित दशरथ रंगशालामा सम्पन्न खेलमा आफिज ओलावालले खेलको दोस्रो मिनेटमा नै गोल गर्दै धनगढीलाई अग्रता दिलाएका थिए । रोहन कार्कीले राइट साइडबाट निकालेको पासलाई आफिजले पोस्टको दिशा दिएका हुन् । प्राप्त पेनाल्टीलाई सदुपयोग गर्न नसक्दा चितवनले धनगढीविरुद्ध तीन महत्वपूर्ण अंक गुमाएको हो ।

पहिलो हाफको इन्जुरी समयमा चितवनले पेनाल्टी पाए पनि त्यसलाई सदुपयोग गर्न नसक्दा खेलमा फर्किन सकेन । १८ यार्ड बक्सभित्र रिचार्ड ओसेईको ह्यान्ड भएपछि चितवनले पेनाल्टी पाएको थियो । तर, त्यसलाई विमल घर्तीमगरले सदुपयोग गर्न सकेनन् । विमलले राइट साइडमा गरेको प्रहारलाई धनगढीका गोलकिपर टेकेन्द्र थापाले विफल बनाएका थिए ।

५३औँ मिनेटमा चितवनका नवयुग श्रेष्ठको हेडर पुनः टिकेन्द्रले असफल बनाए । अफ्रिइ अक्वाहको फ्रिकिकमा बक्सभित्र रहेका नवयुगको हेडरलाई टिकेन्द्रले बाहिर फ्याकिदिए ।

५८औँ मिनेटमा मार्की खेलाडी आशिष चौधरीले खाली पोस्टमा गोल गर्न नसक्दा धनगढीले अग्रता दोब्बर बनाउन सकेन । आफिज ओलावालेले लेफ्ट साइडबाट गोलकिपरलाई विशाल श्रेष्ठलाई कटाउँदै निकालेको बललाई पेनाल्टी क्षेत्रमा अनमार्क रहेका आशिषको प्रहार पोस्टभन्दा निकै परबाट बाहिरियो ।

प्रतियोगितामा धनगढीको यो पाँचौँ खेल हो । जितसँगै शीर्ष स्थानमा उक्लिएको धनगढीले ११ अंक जोडेको छ । धनगढी दोस्रो स्थानको ललितपुर सिटी एफसीभन्दा दुई अंकले अघि छ । चितवनको भने यो छैटौँ खेल हो । प्रतियोगितामा पाँच अंक जोडेको चितवन तालिकाको सातौँ स्थानमा छ ।