काठमाडौं । इन्जुरी समयमा विलियन ओपुकुले गरेको गोल निर्णायक बनेपछि नेपाल सुपर लिग (एनएसएल)को दोस्रो संस्करणमा वीरगन्ज युनाइटेड एफसीले पहिलो जित निकालेको छ । 

बुधबार त्रिपुरेश्वरस्थित दशरथ रंगशालामा सम्पन्न रोमाञ्चक खेलमा वीरगन्जले स्पोर्टिङ इलाम डे मेची एफसीविरुद्ध २–१ को जित निकालेको हो ।

खेलमा पहिले अग्रता भने इलामले बनाएको थियो । १५औँ मिनेटमा आशिष चापागाईंले गोल गर्दै इलामलाई अग्रतामा राखे । एनएसएलमा पहिलो पटक प्लेइङ–११ मा अवसर पाएका आशिषले सुरज बस्नेतले राइट साइडबाट निकालेको पास नियन्त्रणमा लिँदै पेनाल्टी बक्सबाट टप कर्नर गोल गरे । आशिषले यसअघि इलामले खेलेको पाँच खेलमा जम्मा २८ मिनेटमात्र खेल्ने समय पाएका थिए ।

तर, ३४औँ मिनेटमा हिसन गुरुङले गोल गर्दै वीरगन्जलाई  खेलमा फर्काए । राइट साइडबाट सुशिल लामाको क्रसमा बक्सभित्र रहेका हिसनले ‘फर्स्ट टच’ गोल गरे । 

इन्जुरी समयमा प्राप्त पेनाल्टीलाई ओपुकुले सदुपयोग गरेपछि वीरगन्जले प्रतियोगिताकै पहिलो जित सुनिश्चित गर्‍यो । 

सुरज बस्नेतले सुनिल खड्कालाई १८ यार्ड बक्सभित्र फाउल गरेपछि वीरगन्जले पेनाल्टीको अवसर पाएको थियो ।

त्यसअघि २०औँ मिनेटमा इलामका ओमार थिओमको भली ‘टार्गेट’ मा रहेन । सुरजले नै गरेको क्रसमा पेनाल्टी बक्सबाट थिओमले भली प्रहार गरे पनि क्रसबार माथिबाट बाहिरिएको थियो ।

७१औँ मिनेटमा विलियम ओपुकुको प्रहार पोस्ट नजिकबाट बाहिरिदा वीरगन्जले अग्रता बनाउन सकेन । दीपेन्कले लेफ्ट साइडबाट गरेको क्रसमा ओपुकुको ‘थाइ’ ले रोक्दै हाफ भली प्रहार गरे पनि ‘फस्र्ट बार’ नजिकैबाट बाहिरियो ।

खेलको अन्तिम समय तनावपूर्ण बन्यो । खेल समाप्त भएपछि रेफ्रीसँग विवादमा उत्रिए पनि इलामका गोलकिपर विकेट कुथुलाई मुख्य रेफ्री कविन व्यञ्जनकारले रातो कार्ड देखाएका थिए । त्यसपछि इलामका सबै खेलाडी रेफ्रीसँग घम्साघम्सीमा पुगेका थिए । 

इलामका समर्थकले प्यारापिटबाट बोतलसमेत प्रहार गरेका थिए ।

प्रतियोगितामा वीरगन्जको यो पहिलो जित हो । पाँच खेलबाट पाँच अंक जोडेको वीरगन्ज तालिकाको सातौँ स्थानमा उक्लिएको छ । ६ खेलबाट चार अंक जोडेको इलाम तालिकाको पुछारमा छ ।