काठमाडौं । ओर्गे सान्चेजको निर्णायक गोलप्रेरित झापा एफसीले नेपाल सुपर लिग (एनएसएल)को दोस्रो संस्करणमा पहिलो जित निकालेको छ । 

मंगलबार त्रिपुरेश्वरस्थित दशरथ रंगशालामा सम्पन्न खेलमा झापाले बुटवल लुम्बिनी एफसीविरुद्ध १–० को साँघुरो जित निकालेको हो ।

खेलको ३९औँ मिनेटमा ओर्गे सान्चेजले गोल गर्दै झापालाई अग्रता दिलाएका थिए । अञ्जन विष्टले लेफ्ट साइडबाट निकालेको बललाई नियन्त्रणमा लिँदै सान्चेजले पेनाल्टी बक्सबाट सहजै गोल गरे । सान्चेजको यही गोल निर्णायक बन्दा झापाले जारी सिजन पहिलो पटक तीन अंक सुनिश्चित गर्‍यो । 

त्यसअघि दुवै टिमले केही अवसर सदुपयोग गर्न सकेनन् । आठौँ मिनेटमा झापाका ओर्गे सान्चेजले गोलको अवसर सदुपयोग गर्न सकेनन् । कप्तान अञ्जन बिष्टले निकालेको ‘थ्रू’ बललाई नियन्त्रणमा लिँदै पेनाल्टी बक्सबाट गरेको प्रहार बुटवलका गोलकिपर मोहमोदोउले विफल बनाए ।

१३औँ मिनेटमा सर्जे सङको प्रहार पोस्टमा लागेर फर्किदा बुटवलले अग्रता बनाउन सकेन । राइट साइडबाट सरोज तामाङले निकालेको लोअर क्रसलाई बक्सभित्र स्टेफन बिनोङले नियन्त्रणमा लिन खोज्दा सङसम्म बल पुगेको थियो । सङले सोही अवसरमा प्रहार गरे पनि बल दोस्रो बारमा लागेर फर्किएको थियो । रिबाउन्डमा सङले नै पुनः प्रहार गरे पनि यसपटक भने त्यसलाई झापाका गोलकिपर स्टेफन कुपिकले विफल बनाए ।

झापाका अञ्जनले २०औँ मिनेटमा गरेको प्रहार बुटवलका गोलकिपर मोहमोदोउले मुश्किलले बचाए । आवास लामिछानेले मध्यभागबाट निकालेको बललाई मिडफिल्डर प्रशान्त लक्षमले वान टचमा अञ्जनसम्म पूर्याएका थिए । सोही बल टर्न गरी १८ यार्ड बक्सबाहिबाट गरेको प्रहारलाई मोहमोदोउले असफल बचाए । रिबाउन्डमा लक्षण रुचालले ६ यार्ड बक्सबाट प्रहार गरे पनि त्यसले पोस्टको दिशा लिन सकेन ।

२३औँ मिनेटमा झापाका सान्चेजको सशक्त प्रहारमा पुनः बुटवलका गोलकिपर बाधक बने । राइट साइडबाट छिरिङ लामाको क्रसलाई नियन्त्रणमा राख्दै गरेको भली प्रहार मोहमोदोउले असहजताबीच जोगाए ।

७७औँ मिनेटमा प्रदीप लामाले झापाको अग्रता दोब्बर बनाउने सुनौलो अवसर गुमाए । लेफ्ट साइडबाट कप्तान अञ्जनले निकालेको पास पेनाल्टी बक्सभित्र अनमार्क रहेका प्रदीपले नियन्त्रणमा राख्न नसक्दा बुटवलका रक्षक मनग्य नकर्मीले क्लियर गर्दै खतरा टिमको टारे ।

८३औँ मिनेटमा पोस्ट बाधक बन्दा झापाले अग्रता दोब्बर बनाउन सकेन । आवास लामिछानले निकालेको बल नियन्त्रणमा लिँदै लेफ्ट साइडबाट सान्चेजले गरेको प्रहार माथिल्लो बारमा लागेर फर्कियो । सोही रिबाउन्डमा समिराज थोकरको हेडरलाई बुटवलका गोलकिपर मोहमोदोउले विफल बनाए । 

प्रतियोगिताको पहिलो जित निकालेको झापा पाँच खेलबाट ६ अंकसहित तालिकाको छैटौं स्थानमा उक्लिएको छ । झापाले यसअघिका चार खेलमध्ये तीन खेलमा बराबरी खेल्दा एक खेलमा भने हार बेहोरेको थियो ।

झापासँगको हार बेहोर्दा बुटवलले भने तालिकाको शीर्ष स्थानमा उक्लिने अवसर गुमाएको छ । लिग तेस्रो हार बेहोरेको बुटवल सात अंकसहित तालिकाको पाँचौ स्थानमा छ ।