काठमाडौं । नेपाल सुपर लिग (एनएसएल) को दोस्रो संस्करणमा झापा एफसीले बुटवल लुम्बिनी एफसीविरुद्ध पहिलो हाफमा १–० को अग्रता बनाएको छ । 

मंगलबार त्रिपुरेश्वरस्थित दशरथ रंगशालामा जारी खेलको पहिलो हाफमा ओर्गे सान्चेजले गरेको गोलबाट झापाले अग्रता बनाएको हो ।

खेलको ३९औँ मिनेटमा ओर्गे सान्चेजले गोल गर्दै झापालाई अग्रता दिलाए । अञ्जन विष्टले लेफ्ट साइडबाट निकालेको बललाई नियन्त्रणमा लिँदै सान्चेजले पेनाल्टी बक्सबाट सहजै गोल गरे ।

त्यसअघि दुवै टिमले केही अवसर सदुपयोग गर्न सकेनन् । आठौँ मिनेटमा झापाका ओर्गे सान्चेजले गोलको अवसर सदुपयोग गर्न सकेनन् । कप्तान अञ्जनले निकालेको ‘थ्रू’ बललाई नियन्त्रणमा लिँदै पेनाल्टी बक्सबाट गरेको प्रहार बुटवलका गोलकिपर मोहमोदोउले विफल बनाए ।

१३औँ मिनेटमा सर्जे सङको प्रहार पोस्टमा लागेर फर्किदा बुटवलले अग्रता बनाउन सकेन । राइट साइडबाट सरोज तामाङले निकालेको लोअर क्रसलाई बक्सभित्र स्टेफन बिनोङले नियन्त्रणमा लिन खोज्दा सङसम्म बल पुगेको थियो । सङले सोही अवसरमा प्रहार गरे पनि बल दोस्रो बारमा लागेर फर्किएको थियो । रिबाउन्डमा सङले नै पुनः प्रहार गरे पनि यसपटक भने त्यसलाई झापाका गोलकिपर स्टेफन कुपिकले विफल बनाए ।

झापाका अञ्जन विष्टले २०औँ मिनेटमा गरेको प्रहार बुटवलका गोलकिपर मोहमोदोउले मुस्किलले बचाए । आवास लामिछानेले मध्यभागबाट निकालेको बललाई मिडफिल्डर प्रशान्त लक्षमले वान टचमा अञ्जनसम्म पुर्‍याएका थिए । सोही बल टर्न गरी १८ यार्ड बक्सबाहिबाट गरेको प्रहारलाई मोहमोदोउले असफल बचाए । रिबाउन्डमा लक्षण रुचालले ६ यार्ड बक्सबाट प्रहार गरे पनि त्यसले पोस्टको दिशा लिन सकेन ।

२३औँ मिनेटमा झापाका सान्चेजको सशक्त प्रहारमा पुनः बुटवलका गोलकिपर बाधक बने । राइट साइडबाट छिरिङ लामाको क्रसलाई नियन्त्रणमा राख्दै गरेको भली प्रहार मोहमोदोउले असहजताबीच जोगाए ।