काठमाडौं । अन्कारागुकु क्लबका अध्यक्ष फारुक कोकाले रेफ्रीमाथि मुक्का प्रहार गरेपछि टर्किस फुटबल फेडेरेसन (टीएफएफ)ले लिगका सबै खेल स्थगित गरेको छ ।

टर्किस सुपर लिगअन्तर्गत घरेलु मैदानमा भएको रिजेसपोरविरुद्धको खेलका दौरान अन्कारागुकुका अध्यक्ष कोकाले मैदानमै पुगेर रेफ्रीमाथि मुक्का प्रहार गरेका हुन् ।

खेलको ९७औँ मिनेटमा रिजेसपोरले बराबरी गोल फर्काएसँगै फिफा रेफ्री हालि उमल मेलेरले अन्तिम ह्विसिल बजाएका थिए । त्यसपछि मैदानमा प्रवेश गरेर कोकाले रेफ्रीमाथि मुक्का प्रहार गरेका हुन् । सोमबार एर्यामन रंगशालामा भएको खेल १–१ को बराबरीमा सकिएको थियो ।

खेलपछि अन्कारागुकुका समर्थक मैदानमा प्रवेश गर्दै कोकाको प्रहारबाट लडेका मेलेरमाथि आक्रमण गरेका थिए । मेलेरलाई अन्तिममा प्रहरीको सहायतामा ड्रेसिङ रुममा लगिएको थियो ।

“टर्किस फुटबल फेडेरेसनले लिगका सबै खेलहरू अनिश्चित समयका निम्ति स्थगित गर्ने निर्णय  गरेको छ,” उक्त घटनापछि फेडेरेसनले सामाजिक सञ्जाल एक्समा लेखेको छ, “यो घटनासँग सम्बन्धित क्लब, क्लबका अध्यक्ष, अधिकारीहरू र रेफ्रीमाथि आक्रमण गर्ने सबैविरुद्ध कडा कारबाही हुनेछ ।”

घटनापछि कोकालाई हिरासतमा लिन आदेश जारी भइसकेको टर्कीका गृहमन्त्री अली यार्लिकायाले एक्समा लेखेका छन् । उनले घटनामा संलग्न दुईजनालाई प्रहरीले हिरासतमा लिइसकेको समेत जनाएका छन् ।

“टर्किस फुटबलमाथि आज लाजमर्दो रूपमा मुक्का प्रहार भएको छ । घटनामा संलग्न सबैजनाले यसको मूल्य चुकाउनेछन्,” टर्किस फुटबल फेडेरेसनका अध्यक्ष मेहमेत बुयुकेक्सीले भने ।