काठमाडौं । नेपाल सुपर लिग (एनएसएल)को दोस्रो संस्करणमा पोखरा थन्डर्सले सुरुआती अग्रता जोगाउन नसक्दा काठमाडौं रेजर्ससँग २–१ को हार बेहोरेको छ ।

सोमबार त्रिपुरेश्वरस्थित दशरथ रंगशालामा सम्पन्न खेलमा पोखराले १–० को अग्रता बनाए पनि अन्तिम १० मिनेट सम्हालिन नसक्दा तीन अंक गुमाएको हो । काठमाडौंको पुनरागमन जितमा एन्गुने जुनियर र सोखरुखले गोल गरे । पोखराका लागि आयुश घलानले गोल गरेका थिए ।

५९औँ मिनेटमा आयुश घलानले गोल गर्दै पोखरालाई अग्रता दिलाएका थिए । स्टेफन आनोरले करिब २५ यार्ड परबाट गरेका प्रहार काठमाडौंका गोलकिपर अन्जल श्रेष्ठले बचाएका थिए । तर, अन्जलले नियन्त्रणमा लिन नसक्दा सोही रिबाउन्डमा ६ यार्ड बक्सबाट आयुशले गोल गरे ।

तर, ८३औँ मिनेटमा एन्गुने जुनियरले गोल गर्दै काठमाडौंलाई खेलमा फर्काएका थिए । दीपेश गुरुङको पासलाई नियन्त्रणमा लिँदै जुनियरले पेनाल्टी बक्सको लाइनबाट गरेको प्रहार बारमा लागेर गोल भएको थियो ।

यस्तै, इन्जुरी समयमा सोखरुखले गोल गर्दै काठमाडौंलाई २–१ को अग्रतामा राखेका थिए । टोजिडिनोभ कोमिवोनले डिफेन्स लाइनबाट निकालेको बल नियन्त्रणमा लिँदै सोखरुखले राइट साइडबाट ‘फस्र्ट टच’ गोल गरेका थिए ।

सोखरुखको यही गोल निर्णायक बन्दा काठमाडौंले तीन अंक सुनिश्चित गर्दै तालिकाको शीर्ष चारमा स्थान पक्का गर्यो ।

त्यसअघि खेलमा दुवै टिमले केही अवसर बनाए पनि सदुपयोग गर्न सकेनन् । खेलको १४औँ मिनेटमा पोखराका मोसेस त्वमको प्रहारले पोस्टको दिशा लिन सकेन । आयुश घलानले दिएको बल लेफ्ट साइडबाट अघि बढाउँदै १८ यार्ड बक्स बाहिरबाट गरेको प्रहार काठमाडौंका कप्तान अञ्जन राईबाट ‘डिफ्लेक्ट’ हुँदा सेकेन्ड बार नजिकैबाट बाहिरियो ।

२९औँ मिनेटमा काठमाडौंका सोखरुखले १८ यार्ड बक्सबाहिरबाट गरेको फ्रिकिकलाई पोखराका गोलकिपर प्रिसो एन्जांगाले बचाएका थिए ।

३४औँ मिनेटमा काठमाडौंका आन्द्रेस नियाले गोललाइनबाट बल क्लियर गर्दै टिमको खतरा टारे । आयुश घलानले निकालेको थ्रु बललाई त्वमको ‘आउट साइड’ प्रहार सेकेन्ड बारको गोललाइनतर्फ अघि बढे पनि नियाले त्यसलाई क्लियर गरेपछि पोखराले अग्रता बनाउन सकेन । सोही कर्नरमा त्वमले गरेको हेडर काठमाडौंका राजिव लोप्चनले पुनः गोललाइनबाट क्लियर गरेपछि पोखराले अग्रताको अर्को अवसर गुमायो ।

८२औँैं मिनेटमा पोखराका मोसेस त्वमको प्रहार काठमाडौंका गोलकिपर अन्जलले मुश्किलले बचाए । जोए आइडुले मध्यभागबाट निकालेको बल नियन्त्रणमा लिएर काउन्टरमा अघि बढाउँदै पेनाल्टी बक्सबाट गरेको प्रहार अन्जलले विफल बनाएका थिए ।

जितसँगै पाँच खेलबाट आठ अंक जोडेको काठमाडौं तालिकाको चौथो स्थानमा उक्लिएको छ । समान खेलबाट आठ अंक जोडेको पोखरा तालिकाको तेस्रो स्थानमा यथावत् छ ।