काठमाडौं । नेपाल सुपर लिग (एनएसएल) को दोस्रो संस्करणमा पोखरा थन्डर्स र काठमाडौं रेजर्सबीचको पहिलो हाफ गोलरहित बराबरीमा सकिएको छ । 

सोमबार त्रिपुरेश्वरस्थित दशरथ रंगशालामा जारी खेलको पहिलो हाफमा दुवै टिमले गोलका अवसर बनाए पनि सदुपयोग गर्न सकेनन् ।

खेलको १४औँ मिनेटमा पोखराका मोसेस त्वमको प्रहारले पोस्टको दिशा लिन सकेन । आयुश घलानले दिएको बल लेफ्ट साइडबाट अघि बढाउँदै १८ यार्ड बक्स बाहिरबाट गरेको प्रहार काठमाडौंका कप्तान अञ्जन राईबाट ‘डिफ्लेक्ट’ हुँदा सेकेन्ड बार नजिकैबाट बाहिरियो । 

२९औँ मिनेटमा काठमाडौंका सोखरुखले १८ यार्ड बक्सबाहिरबाट गरेको फ्री किकलाई पोखराका गोलकिपर प्रिसो एन्जांगाले बचाएका थिए । 

३४औँ मिनेटमा काठमाडौंका आन्द्रेस नियाले गोललाइनबाट बल क्लियर गर्दै टिमको खतरा टारे । आयुश घलानले निकालेको थ्रू बललाई त्वमको ‘आउट साइड’ प्रहार सेकेन्ड बारको गोललाइनतर्फ अघि बढे पनि नियाले त्यसलाई क्लियर गरेपछि पोखराले अग्रता बनाउन सकेन । सोही कर्नरमा त्वमले गरेको हेडर काठमाडौंका राजिव लोप्चनले पुनः गोललाइनबाट क्लियर गरेपछि पोखराले अग्रताको अर्को अवसर गुमायो ।

पोखरा र काठमाडौं दुवैको यो पाँचौँ खेल हो । पोखरा यो सिजन अपराजित टिम हो । पोखराले चार खेलमा दुई जित र दुई बराबरी खेल्दा आठ अंक जोडेको छ । काठमाडौंले भने चार खेलबाट पाँच अंक जोडेको छ ।

तस्बिरहरू : हरिशजंग क्षेत्री/बाह्रखरी