काठमाडौं । गत सिजनको तेहेरो विजेता म्यानचेस्टर सिटीले इंग्लिस प्रिमियर लिगमा लुटोन टाउनविरुद्ध २–१ को जित निकालेको छ ।

लुटोनको मैदान केनिलवर्थ रोडमा भएको खेलमा सिटीलाई जित दिलाउन बर्नार्डो सिल्भा र ज्याक ग्रेलिसले गोल गरे । घरेलु टिमका एलिजाह अडेबायोले गोल गरेका थिए ।

खेलमा सुरुआती अग्रता भने लुटोन टाउनले बनाएको थियो । पहिलो हाफको इन्ज्युरी समयमा अडेबायोले गरेको गोलबाट घरेलु टिमले अग्रता बनाएको थियो । तर, दोस्रो हाफमा दुई गोल गर्दै सिटी खेलमा फर्कियो ।

६२औँ मिनेटमा सिल्भाले गोल गर्दै पाहुना टिमलाई खेलमा फर्काएका थिए । त्यसको तीन मिनेटपछि नै ग्रेलिसले सिटीलाई २–१ को अग्रतामा राखे । ग्रेलिसको यही गोल निर्णायक बन्दा सिटीले तीन अंक निश्चित गर्‍यो ।

जितसँगै १६ खेलबाट ३३ अंक जोडेको सिटी तालिकाको चौथो स्थानमा छ । समान खेलबाट नौ अंकको लुटोन रेलिगेसन क्षेत्रमा संघर्षरत छ ।

आइतबार नै भएका अन्य खेलमा टोटनहमले न्युक्यासल युनाइटेडलाई ४–१ ले हराउँदा चेल्सी एभर्टनसँग २–० ले पराजित भयो ।

१६ खेलबाट ३० अंक जोडेको एभर्टन पाँचौँ स्थानमा छ । समान खेलबाट २६ अंकको न्युक्यासल सातौँ स्थानमा छ ।

चेल्सीविरुद्ध जित निकालेको एभर्टन १३ अंकसहित १७औँ स्थानमा छ । एभर्टन रेलिगेसन क्षेत्रभन्दा चार अंकले माथि छ । समान खेलबाट १९ अंकको चेल्सी १२औँ स्थानमा छ ।