काठमाडौं । स्टेफन बिनोङले अन्तिम समयमा बराबरी गोल फर्काएपछि बुटवल लुम्बिनी एफसी र एफसी चितवनले नेपाल सुपर लिग (एनएसएल)को दोस्रो संस्करणमा १–१ को बराबरी खेलेका छन् ।

बिहीबार त्रिपुरेश्वरस्थित दशरथ रंगशालामा सम्पन्न खेलको इन्जुरी समयमा स्टेफन बिनोङले गोल गरेपछि बुटवलले हार टारेको हो ।

खेलको ४८औँ मिनेटमा उत्सब राईले गोल गर्दै चितवनलाई अग्रतामा राखेका थिए ।

बुटवलका किपर मोहमोदोउले रिलिज गरेको बल उत्सवले नियन्त्रणमा राख्दै गरेको भलि प्रहार मोहमोदको हातमा बल लागे पनि उनले बचाउने अवसर नै पाएनन् । तर, थपिएको पाँच मिनेट सम्हालिन नसक्दा चितवन अंक बाड्न बाध्य बन्यो ।

तर, इन्जुरी समयमा बिनोङले गोल गरेपछि बुटवल चिवतनबाट एक अंक खोस्न सफल भएको हो । मणीकुमार लामाले मैदानको मध्यभागबाट निकालेको बललाई बिनोङले ६ यार्ड बक्स नजिकबाट दुई रक्षक र गोलकिपरलाई बिट गर्दै गोल गरे ।

यो बराबरीसँगै चितवनले लिगमा चार खेल खेल्दा पाँच अंक जोडेको छ । चितवनले यसअघिका तीन खेलमध्ये एकमा जित, एकमा बराबर र एक खेलमा हारको नजिता आत्मसात गरेको थियो ।

प्रतियोगितामा बुटवलको भने यो पहिलो बराबरी हो । यो खेलसँगै बुटवल चार खेलबाट चार अंक जोडेको छ । बुटवलले यसअघि एक खेलमा जित निकाल्दा दुई खेलमा हार बेहोरेको थियो ।