काठमाडौं । नेपाल इन्भेष्टमेन्ट मेगा बैंकले ऋणी राजेश बास्कोटासहितको समूहले बैंकको अत्यावश्यकीय सेवामा नै अवरोध गर्न खोजेको आरोप लगाएको छ । ऋणीको धम्कीले काम गर्न गाह्रो भएको बैंकको भनाइ छ ।

बैंकको कर्जा उपभोग गरिरहेका झापाको भीरपाखा रिसोर्ट एन्ड फनपार्क र बास्कोटा कृषि तथा पशुपालन प्रालिका अध्यक्ष बास्कोटाका कारण सो अवस्था सिर्जना भएको बैंकले आरोप लगाएको हो ।

बास्कोटाले भने बैंकले स्वीकृत गरेअनुसारको रकम नदिँदा आफ्नो व्यवसाय नै धरापमा परेको जिकिर गरेका छन् ।

सोही विषयमा बास्कोटासहितको समूहले मंगलबार झापास्थित इन्भेष्टमेन्ट मेगा बैंकका सहायक म्यानेजरमाथि अभद्र व्यवहार गरेको थियो । उक्त विवादका विषयमा उनीहरू प्रहरीसम्मै पुगेका थिए । प्रहरी कार्यालयमा पुगेपछि भने दुवै पक्षले आफूहरू छलफल गरेर मिल्ने भन्दै बाहिरिएका थिए ।

के हो बैंक र बास्कोटाबीचको विवाद ?
राजेश बास्कोटाको भीरपाखा रिसोर्ट एन्ड फनपार्क र श्री बास्कोटा कृषि तथा पशुपालन प्रालिका नाममा नेपाल इन्भेष्टमेन्ट मेगा बैंक लिमिटेड (तत्कालीन मेगा बैंक नेपाल लिमिटेड)बाट विभिन्न शीर्षकमा कर्जा सुविधा स्वीकृत भएको थियो । कृषि तथा पशुपालन प्रालिका नाममा स्वीकृत सम्पूर्ण कर्जा सुविधा राजेशले लिइसकेका छन् ।

भीरपाखा रिसोर्ट एन्ड फनपार्क प्रालिका नाममा स्वीकृत विभिन्न शीर्षकका परियोजनाको कर्जा भने निर्माणकार्यको प्रगतिका आधारमा दिने बैंकको सर्त थियो । सोहीबमोजिम बास्कोटाले केही कर्जा समेत लिएका थिए ।

बाँकी कर्जा रकम ऋणीको परियोजनाको प्रगति नभएको भन्दै रोकिएको थियो । त्यो सर्तभित्रै पर्ने बैंकले जनाएको छ । सोही कर्जाका विषयमा बैंक र बास्कोटा एकार्काको आरोप–प्रत्यारोपमा उत्रिएका हुन् ।